धक्कादायक! भंडारा जिल्ह्यात जादूटोण्याच्या संशयावरुन चौघांची नग्न धिंड

जादूटोण्याच्या संशयावरुन चौघांची नग्न धिंड काढून बेदम मारहाण करण्याची घटना तुमसर तालुक्यातील राजापूर येथे शनिवारी रात्री १०.३० वाजताच्या सुमारास घडली.

ठळक मुद्दे२२ जणांना अटकराजापूरची घटना

लोकमत न्यूज नेटवर्क
भंडारा : जादूटोण्याच्या संशयावरुन चौघांची नग्न धिंड काढून बेदम मारहाण करण्याची घटना तुमसर तालुक्यातील राजापूर येथे शनिवारी रात्री १०.३० वाजताच्या सुमारास घडली. याप्रकरणी पोलिसांनी गावातील २४ जणांवर गुन्हा दाखल करण्यात आला असून २२ जणांना अटक करण्यात आली आहे. या घृणास्पद घटनेने संपूर्ण जिल्ह्यात खळबळ उडाली असून जिल्हा पोलीस अधीक्षकांसह वरिष्ठ पोलीस अधीकारी राजापूर येथे तळ ठोकून आहेत.
कचरू फत्तु राऊत (६०), ओमप्रकाश सदाशिव मेश्राम (२७), कुंदन भोजराम गौपाले (४०), मनोहर बळीराम गोटे (७०) अशी पिडीतांची नावे आहेत. गत आठवडाभरापासून गावातील एका महिलेची प्रकृती ठिक नव्हती. औषध उपचार करुनही तिला बरे वाटत नव्हते. दरम्यान तिच्या अंगात येवू लागले. तिने गावातील या चौघांची नावे सांगून त्यांनी जादूटोणा करीत असल्याचे सांगितले. त्यावरुन गत गुरुवारी गावकऱ्यांची बैठक घेण्यात आली. या चौघांना बैठकीला बोलाविण्यात आले. त्यावेळी ओमप्रकाश आणि कचरु बैठकीला उपस्थित होते. त्यांना समजही देण्यात आली. मात्र महिलेच्या अंगात येण्याचा प्रकार थांबला नाही.

एवढ्यातच शनिवारी नागपंचमीच्या दिवशी पुन्हा हा प्रकार सुरु झाला. गावकरी एकत्र आले आणि ओमप्रकाश, कचरु, कुंदन आणि मनोहर याचा चौघांना त्यांच्या घरातून पकडून चौकात आणले. त्यांच्या अंगावरील कपडे काढून रॉकेल ओतून पेटवून देण्यात आले. हातपाय बांधून त्यांची गावातून नग्न धिंड काढण्यात आली. हा प्रकार गावकरी उघड्या डोळ्याने बघत होते. तेवढ्यात गोबरवाही पोलिसांना माहिती देण्यात आली. पोलिसांचे पथक गावात पोहोचले. मात्र गावकऱ्यांनी पोलिसांच्या वाहनालाही घेराव घातला. दरम्यान पोलिसांनी या चौघांची गावकऱ्यांच्या तावडीतून सुटका केली. बेदम मारहाणीत चौघेही जखमी झाले असून त्यांना तुमसर येथील उपजिल्हा रुग्णालयात उपचारासाठी दाखल करण्यात आले आहे.

याप्रकरणी कचरु राऊत यांनी गोबरवाही पोलीस ठाण्यात तक्रार दिली. त्यावरुन योगेश चोपकर, देवा चोपकर, रवी राऊत, महेंद्र राऊत, अविनाश मेश्राम, मच्छिंद्र परबते, निरंजन परबते, सुखदेव परबते, राजकुमार घोनाडे, राजेंद्र गुर्जर, प्रतीक मकराम, प्रविण परबते, विशाल मेश्राम, आकाश वघारे, रिची डोंगरे, शिशिर डोंगरे, आशा चोपकर, मनिषा चोपकर, सुनंदा झोडे, शामकला राऊत, जयकला राऊत, विनिता परबते, ओमकला झोडे सर्व रा.राजापूर आणि नौशाद पठाण रा. गोबरवाही यांच्याविरुध्द भादंवि ३०७, ३५३, ३४१, ३२३, ३२४, १४३, १४८, १४९, ५०४ सहकलम २(१) (ख), ७, महाराष्ट्र जादुटोना प्रतिबंध अधिनियम २०१३ अन्वये गुन्हा दाखल करण्यात आला. यापैकी २२ जणांना पोलिसांनी रविवारी अटक केली आहे. लाकडी काठ्या, प्लास्टिक बॉटल, रॉकेल व पेट्रोलच्या रिकाम्या बॉटल, नॉयलॉन दोरी जप्त करण्यात आल्या आहेत.

घटनेची माहिती होताच जिल्हा  पोलीस अधीक्षक अरविंद साळवे, अपर पोलीस अधीक्षक अनिकेत भारती, स्थानिक गुन्हे शाखेचे प्रमुख गजानन कंकाळे यांनी घटनास्थळी धाव घेतली. सध्या वरिष्ठ पोलीस अधिकारी राजापूर येथे तळ ठोकून आहेत.

वेळीच पाऊस आल्याने चौघे बचावले
गावकऱ्यांनी चौघांची नग्न धिंड काढताना बेदम मारहाण केली. एवढेच नाही तर त्यांच्या अंगावर पेट्रोल ओतून पेटविण्याचा प्रयत्न केला. मात्र त्याचवेळी जोरदार पाऊस आल्याने हे चौघेही बचावले. गावात हा घृणास्पद प्रकार सुरु असताना चौघांच्या मदतीला कुणीही आले नाही. या घटनेने संपूर्ण राजापूर गावात तणावपुर्ण शांतता आहे.