काेणी सेप्टी पीन गिळतो, कोणाच्या नाकात शेंगदाणा, तर कोणाच्या नाकामध्ये गहू !

भंडारा : लहान बालकांकडे २४ तास लक्ष देण्याची गरज असते. आई-वडिलांच्या नजरेआड झालेली बालके कधी अंगावर संकट आणतील याचा नेम नाही. मुलगा-मुलगी खेळत जरी असले तरी ते खेळता-खेळता स्वत:लाच नुकसान कसे पोहोचवतील याचा नेम नाही. यासाठी पालकांनी २४ तास त्यांच्याकडे लक्ष देणे आवश्यक आहे.

लहान मुले खेळताना सेप्टी पीन गिळतात, घरातील लोकांची औषधे खिडकी किंवा टेबलवर ठेवली असतील तर तीदेखील लहान मुले खातात. शेंगदाणे, फुटाणे तोंडात टाकता-टाकता नाकातही टाकतात. यात लहान मुलांच्या संदर्भात परिस्थिती अत्यंत धोकादायक असते व शस्त्रक्रिया कराव्या लागतात. तर काही बालकांचा यात मृत्यूदेखील होतो. भंडारातील तीन महिन्यापूर्वी एका दोन वर्षीय बालकाने प्लॉस्टीकचा तुकडा गिळला होता. मोठ्या शिताफीने तो तुकडा बाहेर काढण्यात आला होता. लहान बालके खेळता-खेळता कोणतीही वस्तू उचलून तोंडात-नाकात टाकतात, याकडे लक्ष द्यावे.

मुले काय करतील याचा नेम नाही

सुटे पैसे तोंडात टाकून ठेवत असल्याने अनेकदा ते पोटात जातात.

सेप्टी पीन किंवा इतर साहित्य तोंडात टाकत असतात त्यामुळे अडचण होते.

खेळता-खेळता गहू, हरभऱ्याची डाळ या वस्तू नाकात टाकत असल्याने त्या श्वसननलिकेत अडकतात.

घरातील लोकांनी आपल्या आजारासाठी आणलेली औषधे खिडकी किंवा कपाटात ठेवली असतील ती औषधे लहान मुले सेवन करतात.

भंडारा जिल्ह्यात काही लहान मुलांनी खेळताना औषधाच्या गोळ्या खाल्ल्याची उदाहरणे घडली आहेत.

मागील वर्षी झाली होती एक शस्त्रक्रिया

लहान मुलांनी पोटात टाकलेली वस्तू व श्वसननलिकेत अडकलेले पदार्थ काढण्यासाठी वर्षभरापूर्वी शस्त्रक्रिया करण्यात आल्या. काही मुलांनी औषधांच्या गोळ्यांचे सेवन केल्याने उपचार करण्यात आले.

अशी घ्या मुलांची काळजी

उंदीर मारण्याचे औषध, आजारासाठी वापरण्यात येणारी औषधे बाहेर ठेवू नका.

लहान मुले खेळत असतील तर, आपली नजर चुकवून ते साहित्य तोंडात किंवा नाकात टाकत असतात. त्यासाठी त्यांच्याकडे लक्ष द्या.

वेळोवेळी खेळत असलेल्या मुलांनी काही खाल्ले तर नाही याची शहानिशा करा, घातक वस्तू त्यांच्या हातात लागणार नाहीत याची खबरदारी घ्या.

खाऊचे शिक्के पोटात टाकतात

कुणाच्या घरी पाहुणे आले की, ते पाहुणे परत जाताना लहान मुलांना खाऊचे पैसे देतात. ते पैसे ती लहान मुले घरातील मंडळींकडे देत नाहीत. ते पैसे आपल्याकडे घेण्याचा मानस घरातील मोठी मंडळीही करीत नाही. शिक्के असलेले पैसे काही काळ आपल्याजवळ बाळगताना लहान मुले कधी खिशात, तर कधी हातात ठेवतात. ते शिक्के अनेक मुले तोंडात टाकतात. त्यामुळे तोंडात ठेवलेला शिक्का तोंडातून पोटात जातो. बहुधा पोटात गेलेला शिक्का काढण्यासाठी बालकांना केळी खायला देतात.