..अन् झोपेत असलेल्या वडिलांना क्रूरकर्म्याने खाटेवरच संपविले; भंडाऱ्यातील थरारक घटना

वडिलांचा खून करुन पसार झालेल्या मुलाला अवघ्या पाच तासात अड्याळ पोलिसांनी जेरबंद केले.

ठळक मुद्देआराेपी मुलाला अटक

अड्याळ (भंडारा) : शेती व जागेच्या हिस्से वाटणीवरून घरातील खाटेवर झोपून असलेल्या वृद्ध वडिलांच्या मानेवर मुलाने कुऱ्हाडीचे घाव घालून खून केला. ही घटना पवनी तालुक्यातील फणाेली येथे शुक्रवारी पहाटे ५.३० वाजता उघडकीस आली. पसार झालेल्या मुलाला अवघ्या पाच तासात अड्याळ पोलिसांनी जेरबंद केले.

शंकर महादेव कावळे (६०, रा. फणोली, ता. पवनी) असे मृत वडिलांचे नाव आहे, तर दुर्योधन शंकर कावळे (३५) असे आरोपी मुलाचे नाव आहे. वडील आणि मुलात गत काही दिवसांपासून शेती व जागेच्या हिस्से वाटणीचा वाद सुरु होता. गुरुवारी रात्रीही याच कारणावरून वाद झाला. त्यानंतर शंकर आपल्या खोलीत झोपायला गेले. मात्र, मध्यरात्रीच्या सुमारास मुलगा दुर्योधनने झोपेत असलेल्या वडिलांच्या मानेवर कुऱ्हाडीने घाव घातले. त्यात ते जागीच ठार झाले. यानंतर मुलगा दुर्योधन तेथून पसार झाला. पहाटे ५.३० वाजता हा प्रकार उघडकीस येताच एकच खळबळ उडाली.

घटनेची माहिती मिळताच अड्याळचे ठाणेदार सुधीर बोरकुटे घटनास्थळी पथकासह दाखल झाले. आरोपीची शोधमोहीम सुरू केली. घटनास्थळाला पोलीस अधीक्षक वसंत जाधव, अतिरिक्त पोलीस अधीक्षक अनिकेत भारती व उपविभागीय पोलीस अधिकारी रिना जनबंधू यांनी भेट दिली.

अवघ्या पाच तासात आरोपी जेरबंद

वडिलांचा खून करुन पसार झालेल्या मुलाचा पोलिसांनी शोध सुरु केला. त्यावेळी भंडारा - नागपूर मार्गावरून तो सायकलने जात असल्याची माहिती मिळाली. त्यावरुन अड्याळ पोलिसांनी जवाहरनगर ते मुजबी दरम्यान त्याला ताब्यात घेतले. ही कारवाई पोलीस कर्मचारी हेमराज सोरते, सुभाष रहांगडाले, प्रमोद कमाने, संदीप नवखरे, जितेंद्र वैद्य, मनोज राने, हितेश हलमारे, भूषण मेश्राम यांनी केली. पोलीस उपनिरीक्षक प्रियंका गोदमले, पोलीस उपनिरीक्षक हरिश्चंद्र इंगोले अधिक तपास करीत आहेत.