विद्यार्थ्यांनी केली पवनीनगरी प्रफुल्लमय

पवनी येथील वीर शहीद मेजर प्रफुल्ल मोहरकर यांना आदरांजलीचा कार्यक्रम पार पडला.

ठळक मुद्देशहिदांच्या जयघोषाने निनादली पवनी

आॅनलाईन लोकमत
पवनी : पवनी येथील वीर शहीद मेजर प्रफुल्ल मोहरकर यांना आदरांजलीचा कार्यक्रम पार पडला. यात विद्यार्थ्यांनी काढलेल्या शांतता रॅलीत उत्स्फूर्त सहभाग नोंदवून ‘शहीद प्रफुल्ल मोहरकर अमर रहे’ च्या घोषणा देवून पवनीनगरी प्रफुल्लमय केली.
शहीद मेजर प्रफुल्ल मोहरकर यांना आदरांजली, शांतता रॅली व सैन्य अधिकारी यांच्या मार्गदर्शनाचा कार्यक्रम पवनीतील युवकांनी पुढाकार घेऊन आयोजित केला होता. कार्यक्रमाला जिल्हाधिकारी सुहास दिवसे, जिल्हा सैनिकी अधिकारी लेफ्टनंट नितीन पांडे, कम्युनिकेशन विंग सार्जंट चंद्रशेखर कुलकर्णी, फ्लॉईट इंजिनिअर वारंट आॅफीसर लक्ष्मीकांत वांदद्रोणकर, आमदार अ‍ॅड.रामचंद्र अवसरे, नगराध्यक्ष पूनम काटेखाये व शहिद प्रफुल्ल यांच्या आई सुधाताई , वडील अंबादास मोहरकर, पत्नी अबोली मोहरकर हे उपस्थित होते.
जिल्हाधिकारी यांनी मार्गदर्शनात विद्यार्थ्यांनी मनापासून संवाद साधला. ते म्हणाले, आजच्या पिढीला आदर्श नसल्याची ओरड होत असते. मात्र शहीद प्रफुल्लसारखे आदर्श आमच्या समाजात आहेत. आपण अगदी सुरुवातीपासूनच विद्यार्थी दशेत मेहनत प्रामाणिकपणा व जिद्द ठेवली पाहिजे. देशभक्तीपर प्रोत्साहनपर कार्यक्रमांना कुठलाही निधी कमी पडू देणार नाही असे जाहीर प्रकटन मंचावरून त्यांनी करताच सर्व उपस्थितांनी व विद्यार्थ्यांनी कृतज्ञतापूर्व कटाक्षाने त्यांचे आभार मानले. निवृत्त सैन्य अधिकाऱ्यांनी पवनीचे विद्यार्थी शिस्तबद्ध असून त्यांच्यात निश्चितच देशभक्ती असल्याचे सांगितले. सैन्यात भरती होण्यासाठी सर्वच घटकांना त्यांनी यथोचित मार्गदर्शन केले. आमदार अवसरे यांनी येथील जनतेनी दाखविलेल्या सहकार्याबद्दल सहानुभूती व्यक्त केली.
सुधाताई मोहरकर यांनी शहीद प्रफुल्ल यांच्या आठवणी सांगताना म्हणाल्या, प्रफुल्ल लहान असताना वाचन व वक्तृत्व यावर भर देत होता. प्रफुल्ल निर्भीड होता. त्याच्यात नेतृत्वगुण कुटून भरलेले होते. माझ्या मुलाने माझा व पवनीचा मानसन्मान वाढविला असून याच मातीचा गंध त्याच्या हौतात्म्याने आले असल्याचे अभिमानाने सांगितले. सुनिल मोटघरे यांनी शहीद प्रफुल्ल यांच्या जीवनावर तयार केलेला व्हीडीओ व शहीद प्रफुल्ल यांच्या मित्राने लिहिलेली कविता वाचून दाखविताच उपस्थितांच्या डोळ्यात गौरवाश्रू तरळले. कार्यक्रमाकरिता सुनिल मोटघरे, मच्छिंद्र हटवार, राजेश चोपकर, विलास येलमुले, सुनिल हटवार, देवराज बावनकर, संदीप नंदरधने, किशोर जिभकाटे यांनी सहकार्य केले.