दुचाकीची सामोरा-समोर धडक

दोन दुचाकीची समोरा-समोर धडक झाल्याने दोन्ही दूचाकीचालक जखमी झाले. ही घटना शनिवारी दुपारी १ वाजताच्या सुमारास भंडारा- कारधा मार्गावरील साई मंदिर समोर घडली.

भंडारा : दोन दुचाकीची समोरा-समोर धडक झाल्याने दोन्ही दूचाकीचालक जखमी झाले. ही घटना शनिवारी दुपारी १ वाजताच्या सुमारास भंडारा- कारधा मार्गावरील साई मंदिर समोर घडली. जखमी हे भंडारा येथील रहिवासी असून त्यांचे आडनाव बागडे असल्याचे समजते. माहितीनुसार कचरखेडा येथे मंडई पाहून स्वगावी परतत असतांना विरुध्द दिशेने येणाऱ्या दूचाकीत धडक झाली. धडक एवढी जबरदस्त होती की दोन्ही दूचाकीच्या दर्शनी भागाचे मोठे नुकसान झाले. घटनास्थळी जमावाने गर्दी केली होती. नागरिकांच्या सहकार्याने जखमींना जिल्हा सामान्य रुग्णालयात दाखल करण्यात आले. रात्री उशिरापर्यंत घटनेची नोंद पोलिसांनी केली नव्हती. जखमी हे भंडारा येथील भोजापूर व शहिद वॉर्डातील असल्याची माहिती आहे. या संदर्भात भंडारा पोलिसांशी चर्चा केली असता गुन्हे दाखल करण्याची प्रक्रिया सुरु असल्याचे सांगण्यात आले.
भंडारा-कारधा मार्गावर दररोज अपघात घडत आहेत. शुक्रवारी रुग्णालयाकडे जाणाऱ्या मार्गानजीक एका ३५ वर्षीय युवकाचा दुचाकीवरुन नियंत्रण सुटल्याने दूचाकी थेट सिमेंट खांबावर आदळली. यात दुचाकी स्वार गंभीर जखमी झाला. त्याला खाजगी रुग्णालयात हलविण्यात आले. अपघातात दुचाकीचे मोठे नुकसान झाले होते. घटनेची नोंद पोलिसात केलेली नाही. काही सामाजिक कार्यकर्त्यांनी जखमीच्या नातेवाईकांना बोलावून त्याची रवानगी खाजगी रुग्णालयात करण्यात आली. (नगर प्रतिनिधी)