जेवणाळा ते पालांदुर रस्त्याचे रुंदीकरण करा

भंडारा : जेवणाळा ते पालांदूरकडे जाणाऱ्या रस्त्याच्या रुंदीकरणासह डांबरीकरणाचे काम रखडले असून, या रस्त्याचे काम सुरू करण्याकडे संबंधित विभागाचे अक्षम्य दुर्लक्ष होत असल्याने प्रवासी व वाहनचालकांना प्रवास करताना कमालीचा त्रास सहन करावा लागत आहे. या रस्त्याचे काम तत्काळ सुरू करावे, अशी मागणी होत आहे. मात्र, याकडे दुर्लक्ष करण्यात येत असून, याविरोधात तीव्र जनआंदोलन करण्याचा इशारा भीम शक्ती संघटनेने निवेदनाद्वारे दिला आहे.

लाखनी तालुक्यातील पालांदूर हे सर्वात मोठे गाव असून, येथे शाळा, महाविद्यालय, विविध बँका, पोलीस स्थानक, रुग्णालय व बाजारपेठ असून, परिसरातील नागरिकांना दररोज विविध कामानिमित्त पालांदूर येथे यावे लागते. तसेच मानेगाव ते पालांदूर या मार्गावरून लाखांदूर, अड्याल, पवनी, गडचिरोली, चंद्रपूरकडे राज्य परिवहन महामंडळाची बससेवा सुरू आहे तसेच पादचारी, सायकलस्वार, दुचाकी, चारचाकी वाहनधारकांना सतत प्रवास करावा लागतो, एवढेच नव्हे तर विद्यार्थ्यांना शाळा, महाविद्यालयात विद्यार्जन करण्यासाठी जावे लागते, नागरिकांना बँकेच्या कामानिमित्त ये-जा करावी लागते तसेच रुग्णांना औषधोपचारांसाठी पालांदूर येथील रुग्णालयात जावे लागते. आठवडा बाजाराच्या निमित्ताने या मार्गावर मोठी वर्दळ असते. त्यामुळे मानेगाव ते पालांदूर या रस्त्याचे रुंदीकरण व डांबरीकरण करण्याचे काम सुरू झाले असून, मानेगाव ते गुरढाया गावापर्यंत रुंदीकरण व डांबरीकरण पूर्ण झाले आहे. परंतु, माशी कुठे शिंकली कुणास ठाऊक जेवणाला ते पालांदूरपर्यंतच्या रस्त्याचे रुंदीकरण व डांबरीकरण काम रखडले असून, रस्त्यावर मोठमोठे खड्डे पडल्याने प्रवाशांना कमालीचा शारीरिक व मानसिक त्रास सहन करावा लागत आहे. या खड्ड्यांमुळे अपघात झाल्यास जीवित व वित्तहानी होण्याची शक्यता नाकारता येत नसून, याला जबाबदार कोण? असा प्रश्न उपस्थित करण्यात येत आहे.

जेवणाला ते पालांदूर रस्त्याचे काम सुरू न करण्याचे कारण काय? या रस्त्याचे काम ज्या एजन्सीला देण्यात आले त्यांनी काम सुरू करण्यास अतिविलंब करण्याचे कारण काय? या रस्त्याचे काम सुरू करणार किंवा कसे, याला जबाबदार कोण, आदी प्रश्न निर्माण झाले आहेत. याबाबत नागरिकांमध्ये तीव्र नाराजी व असंतोष पसरला असून, भविष्यात या असंतोषाचा तीव्र भडका उडण्याची शक्यता नाकारता येत नाही.

संबंधित विभागाने वेळीच दखल घेऊन या रस्त्याचे रुंदीकरण व डांबरीकरण काम तत्काळ सुरू करण्याची मागणी भीमशक्ती संघटनेचे जिल्हाध्यक्ष प्रकाश देशपांडे, एस. के. वैद्य, बाळकृष्ण शेंडे, हरिदास बोरकर, भागवत दामले, वामन कांबळे, माधव बोरकर, हर्षवर्धन हुमने, कोमल कांबळे, जयपाल रामटेके, फाल्गुन वंजारी, रूपा मेश्राम, नंदू वाघमारे, तोताराम दहिवले, महादेव देशपांडे, अरुण ठवरे, दामोधर उके, नत्थू सूर्यवंशी, उमाकांत काणेकर, अविनाश खोब्रागडे, यशवंत घरडे, जितेंद्र खोब्रागडे, सुरेश गेडाम, नितीश काणेकर, निकाराम शेंडे, सुभाष शेंडे, अविनाश बोरकर, शांताराम खोब्रागडे यांनी केली आहे.