जेवणाळा ते पालांदूर रस्त्याचे रुंदीकरण करा

लाखनी तालुक्यातील पालांदूर सर्वात मोठे गाव असून येथे शाळा, महाविद्यालय, विविध बँका, पोलीस ठाणे, रुग्णालय व बाजारपेठ असून परिसरातील नागरिकांना दररोज विविध कामानिमित्त पालांदूर येथे आवागमन करावे लागते. तसेच मानेगाव ते पालांदूर या मार्गावरून लाखांदूर, अड्याळ, पवनी, गडचिरोली, चंद्रपूरकडे राज्य परिवहन महामंडळ विभागाची बससेवा सुरू आहे. तसेच पादचारी, सायकलस्वार, दुचाकी, चारचाकी वाहनधारकांना सतत प्रवास करावा लागतो, एवढेच नव्हे तर विद्यार्थ्यांना शाळा, महाविद्यालयात विद्यार्जन करण्यासाठी जावे लागते. नागरिकांना बँकेच्या कामानिमित्त ये-जा करावी लागते तसेच रुग्णांना औषधोपचारासाठी पालांदूर येथील रुग्णालयात जावे लागते. आठवडी बाजाराच्या निमित्ताने या मार्गावर मोठी वर्दळ असते. त्यामुळे मानेगाव ते पालांदूर या रस्त्याचे रुंदीकरण व डांबरीकरण करण्याचे काम सुरू झाले आहे. मानेगाव ते गुरढा या गावापर्यंत रुंदीकरण व डांबरीकरण पूर्ण झाले. परंतु माशी कुठे शिंकली कुणास ठाऊक जेवणाळा ते पालांदूरपर्यंतच्या रस्त्याचे रुंदीकरण व डांबरीकरण करण्याचे काम रखडले असून रस्त्यावर मोठमोठे खड्डे पडले आहेत.

प्रशासनाच्या संबंधित विभागाच्या यंत्रणेने वेळीच दखल घेऊन सदर रस्त्याचे रुंदीकरण व डांबरीकरण करण्याचे काम तात्काळ सुरू करण्याची मागणी भीमशक्ती संघटनेचे जिल्हाध्यक्ष प्रकाश देशपांडे. एस.के. वैद्य, बाळकृष्ण शेंडे, हरिदास बोरकर, भागवत दामले, वामन कांबळे, माधव बोरकर, हर्षवर्धन हुमणे, कोमल कांबळे, जयपाल रामटेके, फाल्गुन वंजारी, रूपा मेश्राम, नंदू वाघमारे, तोताराम दहिवले, महादेव देशपांडे, अरुण ठवरे, दामोधर उके, नत्थू सुर्यवंशी, उमाकांत काणेकर, अविनाश खोब्रागडे, यशवंत घरडे, मोरेश्वर लेधारे, जितेंद्र खोब्रागडे, सुरेश गेडाम, नितीश काणेकर, निकाराम शेंडे, सुभाष शेंडे, अविनाश बोरकर, शांताराम खोब्रागडे यांनी केली आहे.