पिकअप व मोटरसायकल अपघातात महिला जागीच ठार, तीन गंभीर 

दूध घेऊन जाणाऱ्या वाहनाने मोटरसायकलला जबर धडक दिल्याने झालेल्या अपघातात एक महिला जागीच ठार झाली तर तीनजण गंभीर जखमी झाले.

ठळक मुद्दे  मोहाडी तालुक्यच्या पालडोंगरी-सालई खुर्द चौरस्त्यावरील घटना

भंडारा : दूध घेऊन जाणाऱ्या वाहनाने मोटरसायकलला दिलेल्या धडकेत एक महिला जागीच ठार तर तीनजण गंभीर जखमी झाले. ही घटना मोहाडी तालुक्यच्या पालडोंगरी-सालई खुर्द चौरस्त्यावर रविवारी सकाळी १० वाजता घडली.

पल्लवी चैनलाल बशीने ( २२)  रा. खुटसावरी असे मृत महिलेचे नाव आहे. चैनलाल बशीने(२७),  तन्नू कुवरलाल बशीने (६), प्रियान्स कुवरलाल बशीने(४)असे जखमींची नावे आहेत.

पालडोंगरी चौरस्त्यावर  झुडुपी वनस्पती मोठ्या प्रमाणात वाढली आहे. त्यामुळे समोरचे वाहन न दिसल्याने टांगाकडे जात असलेल्या दुग्ध वाहक वाहनाने समोरुन येत असलेल्या मोटरसायकलला जोरदार धडक दिली. ही धडक इतकी जबर होती की त्यात पल्लवी हिच्या डोक्याला गंभीर दुखापत झाल्याने तिचा जागीच मृत्यू झाला. तर इतर सर्वजण गंभीर जखमी झाले आहेत. 

या घटनेप्रकरणी दुग्ध वाहन चालक यास आंधळगाव पोलिसांनी त्याब्यात घेतले आहे. पुढील तपास आंधळगाव पोलीस स्टेशनचे पोलीस निरीक्षक सुरेश मट्टामी यांचे मार्गदर्शनाखाली उपनिरीक्षक गणेश पडवार, बिट जमादार विजय मोदणकर करीत आहे.