वाहनांसह २४ लाखांचा गुटखा पकडला!

ठळक मुद्देखामगाव पोलिसांची धाडसी कारवाईगांधी चौकातील दिलीप र्जदावर छापा तसेच बोलेरो पकडून मोठय़ा प्रमाणावर गुटख्याचा साठा जप्त

लोकमत न्यूज नेटवर्क
खामगाव : पोलिसांनी शहरातून शुक्रवारी पुन्हा लाखोंचा प्रतिबंधित गुटखा पकडला आहे. येथील गांधी चौकातील दिलीप र्जदावर छापा मारून, तसेच रेल्वे स्टेशनजवळून एक बोलेरो पकडून मोठय़ा प्रमाणावर गुटख्याचा साठा जप्त करण्यात आला आहे.
दोन दिवसांपूर्वीच शहर व शिवाजीनगर पोलिसांनी किसननगर जवळून दोन लाखांचा गुटखा पकडला होता. या कारवाईची चर्चा थांबत नाही, तोच शुक्रवारी पुन्हा पोलिसांनी लाखोंचा गुटखा पकडला आहे. मिळालेल्या गुप्त माहितीच्या आधारे शहर पोलिसांनी शुक्रवारी दुपारी २ वाजेदरम्यान रेल्वे स्टेशनसमोर संशयावरून बोलेरो क्र.एमएच-३७ जे ९३९२ ची तपासणी केली. यावेळी सदर गाडीत मोठय़ा प्रमाणावर गुटख्याचा साठा आढळून आला. पोलिसांच्या माहितीनुसार सदर गाडीतून अंदाजे ५ लाख ६५ हजार रुपयांचा गुटखा जप्त करण्यात आला आहे, तर  साडेचार लाख रुपयांची बोलेरो जप्त करून चालकास अटक करण्यात आली आहे. त्यानंतर पोलिसांचे पथक गांधी चौकातील दिलीप र्जदावर धडकले. पोलिसांनी सदर दुकानाची झडती घेऊन तळघरात ठेवलेला गुटख्याचा साठा जप्त केला. 
या ठिकाणावरून १३ लाख ८५ हजारांचा गुटखा पकडल्याची माहिती पोलिसांनी दिली. या दोन्ही कारवाया ठाणेदार यू.के.जाधव यांच्या मार्गदर्शनात पीएसआय तावडे, एपीआय रामराव राठोड, पोहेकाँ वसंतराव देशमुख, पोकाँ महादेव धंदरे, संदीप टाकसाळ यांच्यासह पथकाने केल्या. या कारवाईमुळे अवैध व्यावसायिकांचे धाबे दणाणले आहेत. 
-