भरधाव कार खांबावर धडकली, सुदैवाने कुठलीही जीवितहानी झाली नाही

ही घटना गुरूवारी रात्री ११.१५ वाजता दरम्यान खामगाव-नांदुरा रोडवर न्यायालयासमोर घडली.

खामगाव : भरधाव कार रस्ता दुभाजकाच्या मधात असलेल्या खांबाला धडकली. त्यामुळे पथदिव्यांचा खांब अक्षरश: तुटून खाली कोसळला. ही घटना गुरूवारी रात्री ११.१५ वाजता दरम्यान खामगाव-नांदुरा रोडवर न्यायालयासमोर घडली. याबाबत सविस्तर असे की, गो.से. महाविद्यालयाकडून शहराच्या दिशेने एमएच२८-सी-५२६२ ही कार भरधाव वेगाने येत होती. 

दरम्यान न्यायालयासमोर कार चालकाचे वाहनावरील नियंत्रण सुटले. त्यानंतर ही कार रस्ता दुभाजक आणि त्याच्या मधात असलेल्या खांबाला धडकली. त्यामुळे खांब खाली कोसळला. या अपघातात सुदैवाने कुठलीही प्राणहानी झाली नाही. मात्र कारमधील दोघेजण किरकोळ जखमी झाल्याचे समजते. या अपघातानंतर घटनास्थळी बघ्यांची चांगलीच गर्दी जमली होती. अपघातामुळे खांब रस्त्यावर पडल्यामुळे काही काळ वाहतूक विस्कळीत झाली होती. 

घटनेची माहिती मिळताच शहर पोलिसांचे एक पथक घटनास्थळी धडकले. प्रत्यक्षदर्शींच्या मदतीने रस्त्यावरील खांब हटविण्यात आला. त्यानंतर खामगाव-नांदुरा महामार्गावरील वाहतूक सुरळीत होण्यास मदत झाली.