तरुणीसोबत असभ्य वर्तन करणा-यांवर कारवाई

मलकापूर येथील घटना; युवकांनी दिला चोप.

मलकापूर ( जि. बुलडाणा) : सुनसान भागात नवीन बांधकाम सुरु असलेल्या जागेचा सहारा घेत एका तरुणीसोबत दोन इसमांना नको त्या अवस्थेत आढळून आल्याने त्या भागातील तरुणांनी दोन्ही इसमांना चांगलाच चोप देत पोलिसांच्या स्वाधीन केल्याची घटना १२ ऑगस्टच्या सायंकाळी ७ वाजताच्या दरम्यान मुकुंदनगर परिसरात घडली. याप्रकरणी पोलिसांनी त्या इसमांविरुध्द असभ्य वर्तणुकीचा गुन्हा दाखल केला आहे. स्थानिक मुकुंदनगर परिसरात नवीन बांधकामे सुरु आहेत. यातील एका बांधकामाचा सहारा घेत १२ ऑगस्ट रोजी सायंकाळी एक तरुणी व दोन इसम बिल्डींगमध्ये नको ते चाळे करीत असल्याचे परिसरातील काही युवकांना कळले. या युवकांनी त्याठिकाणी त्या इसमांना काही समजण्या अगोदरच धडक देत त्यांना नको त्या अवस्थेत रंगेहाथ पकडत त्यांना चांगलाच चोप दिला. या दरम्यान त्या तरुणीने तोंडाला स्कार्प बांधून त्याठिकाणावरुन पोबारा केला. जमलेल्या युवकांनी त्या दोन्ही युवकांना यथेच्छ चोप देत त्यांना पोलिसांच्या स्वाधीन केले. या प्रकरणी पीएसआय राहुल मोरे यांनी दिलेल्या फिर्यादीवरुन शहर पोलिसांनी सै.खलील सै.रसुल वय ३८ रा. ताजनगर पारपेठ व शे. जावेद शे.छोटू वय ३३ रा. काझीप्लॉट पारपेठ या दोघांविरुध्द कलम ११0/१0७ अन्वये असभ्य वर्तणुकीचे गुन्हे दाखल केले आहेत. या भागात नेहमीच असे प्रकार घडतात. त्यामुळे पोलिसांनी अशा असभ्य वर्तन करणार्‍यांवर कडक कारवाई करावी, अशी मागणी केल्या जात आहे.