खामगावात वादातून ऑटोचालकावर कटरने हल्ला

परस्पर विरोधी तक्रारीवरून दोघांविरोधात गुन्हा दाखल करण्यात आला.

खामगाव - वादातून एका ३३ वर्षीय ऑटो चालकावर कटरने हल्ला करण्यात आला. ही घटना गुरूवारी दुपारी स्थानिक सुटाळपुरा भागात घडली. याप्रकरणी जखमी ऑटोचालकाच्या तक्रारीवरून हल्ला करणार्या विरोधात गुन्हा दाखल करण्यात आला. दरम्यान, हल्ला करणार्यानेही मारहाण झाल्याची तक्रार शिवाजी नगर पोलीसांकडे केली. परस्पर विरोधी तक्रारीवरून दोघांविरोधात गुन्हा दाखल करण्यात आला.

याबाबत सागर गजानन जामोदे याने शिवाजी नगर पोलीस स्टेशनमध्ये दिलेल्या तक्रारीत नमूद केले की, गुरूवारी दुपारी सुटाळपुरा भागातील एका गॅरेजवर तो बसला होता. दरम्यान, तिथे शंकर प्रल्हाद शेलकर याने त्यांच्याशी वाद घातला. काही समजण्याच्या आतच कटरने गालावर आणि उजव्या कानावर हल्ला केल्याचा आरोप तक्रारीत केला. तसेच यावेळी झालेल्या झटापटीत काळ्या धाग्यातील दोन ग्रॅम सोन्याचे लॉकेट येथे पडल्याचेही तक्रारीत नमूद केले. या तक्रारीवरून शिवाजी नगर पोलीसांनी आरोपी शंकर प्रल्हाद शेलकर याच्या विरोधात भादंवि कलम ३२४ अन्वये गुन्हा दाखल केला.

शंकर प्रल्हाद शेलकर याने दिलेल्या तक्रारीत नमूद केले की, गुरूवारी दुपारी तो सुटाळपुर्यातील प्रेसच्या दुकानावर काम करीत असताना आरोपी सागर जामोदे हा गुटखा खाऊन थुंकला. याबाबत त्याला हटकले असता, चापटा बुक्यांनी मारहाण करून कटरने उजव्या हाताच्या बोटाला मारून जखमी केल्याचा आरोप तक्रारीत केला. या तक्रारीवरून शिवाजी नगर पोलीसांनी सागर जामोदे विरोधात भादंवि कलम ३२४, ३२३, ५०४ अन्वये गुन्हा दाखल केला. पुढील तपास शिवाजी नगर पोलीस करीत आहेत.