ऑटोला अज्ञात वाहनाची धडक, एक जण ठार, चौघे जण गंभीर जखमी

ही घटना गुरूवारी पहाटे ४ वाजता दरम्यान खामगाव चिखली रस्त्यावरील अंत्रज शिवारातील सिंधीनाल्याजवळ घडली.

खामगाव: भाजीपाला बाजारात घेऊन जात असलेल्या शेतकर्यांच्या ऑटोला अज्ञात वाहनाने पाठीमागून धडक दिली. यात एकजण ठार झाला. तर चौघे जण गंभीर जखमी झाले. ही घटना गुरूवारी पहाटे ४ वाजता दरम्यान खामगाव चिखली रस्त्यावरील अंत्रज शिवारातील सिंधीनाल्याजवळ घडली.

याबाबत शंकर बाळकृष्ण बगाडे (४८, रा. अंत्रज) यांनी ग्रामीण पोलीस स्टेशनमध्ये दिलेल्या तक्रारीत नमूद केले की, त्यांचे चुलत भाऊ निलेश जगदेव बगाडे, अनिल जगदेव बगाडे, पुरूषोत्तम जगदेव बगाडे, मोहन वानखडे आणि ऑटो चालक शिवा ज्ञानेश्वर भारसाकळे असे पाच जण भाजीपाला घेऊन खामगावकडे जात होते. दरम्यान, पाठीमागून आलेल्या अज्ञात वाहनाने एमएच २८ एबी ४५०५ या ऑटोला जबर धडक दिली. 

धडक दिल्यानंतर ऑटो उलटून झालेल्या अपघातात अनिल जगदेव बगाडे यांचा मृत्यू झाला. तर चौघे जण गंभीर जखमी झाल्याचा आरोप तक्रारीत केला. या तक्रारीवरून ग्रामीण पोलीसांनी अज्ञात वाहन चालकाविरोधात भादंवि कलम ३०४ (अ), २७९, ३३७, ४२७ अन्वये गुन्हा दाखल करण्यात आला. पुढील तपास खामगाव ग्रामीण पोलीस करीत आहेत.

जखमींना अकोला येथे हलविले
या अपघाताची माहिती मिळताच, अंत्रज येथील नागरिक घटनास्थळी दाखल झाले. प्रत्यक्षदर्शीच्या मदतीने अपघात ग्रस्तांना सामान्य रूग्णालयात हलविण्यात आले. तपासणीअंती अनिल बगाडे यांना मृत घोषीत करण्यात आले. तर चौघा जखमींना प्रथमोपचारानंतर अकोला येथे हलविण्यात आले. या घटनेमुळे अंत्रज येथे शोककळा पसरली आहे.