अर्थसंकल्पीय घोषणेनुसार जिल्ह्यास मिळणार ८ रुग्णवाहिका

कोरोना संसर्गाच्या पार्श्वभूमीवर रुग्णवाहिकांची कमी असलेली संख्या पाहता, निर्माण होणाऱ्या समस्येचे निराकरण करण्याच्या दृष्टीने गेल्या वर्षी उपमुख्यमंत्री तथा वित्तमंत्री अजित पवार यांनी आरोग्य संस्थांच्या जुन्या रुग्णवाहिका बदलून नवीन रुग्णवाहिका खरेदी करण्याची घोषणा केली होती. मात्र, आर्थिक वर्ष संपताना अनुषंगिक प्रक्रिया पूर्ण न झाल्यामुळे बीडीएसवर प्राप्त असलेले अनुदान संक्षिप्त देयकावर काढण्याबाबत परवानी मिळविण्यात आली होती. त्यानुषंगाने आरोग्यसेवा आयुक्तालय स्तरावरून राज्यातील २४३ प्राथमिक आरोग्य केंद्रासाठी रुग्णवाहिका खरेदी करण्यात आल्या आहेत. त्यापैकी ८ रुग्णवाहिका या बुलडाणा जिल्ह्यास मिळणार असून, अल्पावधीतच त्या जिल्ह्यास प्राप्त होणार असल्याचे सूत्रांनी स्पष्ट केले. बुलडाणा जिल्ह्यासाठी आरोग्य विभागाने ४८ रुग्णवाहिकांची आवश्यकता असल्याचे स्पष्ट केले होते. मात्र, त्या तुलनेत बुलडाणा जिल्ह्यात फक्त ८ रुग्णवाहिका मिळत आहेत. म्हणजेत एकूण मागणीच्या १६ टक्केच रुग्णवाहिका जिल्ह्याला उपलब्ध होत आहेत. गेल्या वर्षी अर्थसंकल्पीय अधिवेशनात ५०० रुग्णवाहिका खरेदी करण्यासाठी ८९ कोटी ४८ लाख रुपयांच्या खर्चास मान्यता देण्यात आली होती.

-- जिल्ह्यात १०४ रुग्णवाहिका--

जिल्ह्यात १०८ रुग्णवाहिकांची संख्या २३ असून, बुलडाणा जिल्हा सामान्य रुग्णालयात ७, खामगाव सामान्य रुग्णालयात ३, शेगाव उपजिल्हा रुग्णालयात ३, मलकापूर उपजिल्हा रुग्णालयात २, ग्रामीण रुग्णालयांमध्ये १४, क्षय आरोग्य धामची एक रुग्णवाहिका आणि प्राथमिक आरोग्य केंद्रांच्या ५२ रुग्णवाहिका आहेत. त्यामध्ये आता या नव्याने येणाऱ्या रुग्णवाहिकांची भर पडून जिल्ह्यातील रुग्णवाहिकांची संख्या ही ११२ होणार आहे.

--या पीएससींना मिळणार रुग्णवाहिका--

जिल्ह्यातील नांदुरा, जवळखेड, जामोद, अटाळी, रायगाव, सुलतानपूर, टाकरखेड आणि संग्रमापूर या आठ प्राथमिक आरोग्य केंद्रांना नव्याने येणाऱ्या रुग्णवाहिका मिळणार आहेत. संबंधित प्राथमिक आरोग्य केंद्रांनाच या रुग्णवाहिकांचा वापर करणे अनिवार्य राहणार आहे, तसेच या ठिकाणी वाहन चालकाचे पद भरलेले नसल्यास, कंत्राटी तत्त्वावर बाह्ययंत्रणेमार्फत ते भरण्यासंदर्भातही मान्यता देण्यात आलेली आहे.