दत्तपूरचे उपसरपंच पत्नीसह अपघातात ठार

जाफराबाद जवळील चिंचोली येथे झाला अपघात

सिंदखेडराजा : तालुक्यातील दत्तपूर येथील उपसरपंच राजू सोनलाल पवार हे पत्नीसह अपघातात जागीच ठार झाल्याची घटना जालना जिल्ह्यातील जाफराबादनजीक असलेल्या चिंचोली गावाजवळ १८ मे रोजी सकाळी दहा वाजण्याच्या सुमारास घडली.

राजू पवार (३५) व त्यांच्या पत्नी शोभा (३०) हे दोघे दुचाकीने एका लग्न सोहळ्यासाठी जालना जिल्ह्यातील भोकरदनकडे दुचाकीवरून जात होते. दरम्यान, जाफराबादनजीक चिंचोली गावाजवळ वाळूची वाहतूक करणाऱ्या टिप्परची व त्यांच्या दुचाकीची समोरासमोर जबर धडक झाली. ही धडक एवढी जबर होती की, राजू पवार व त्यांची पत्नी या धडकेत जागीच ठार झाले. त्यांच्या डोक्यातील हेल्मेटही अक्षरश: चुरा झाले होते. या घटनेची माहिती मिळताच मदतीसाठी अनेकांनी धाव घेतली. पोलिसांनीही घटनास्थळी जाऊन कायदेशीर कारवाई पूर्ण केली. जाफराबाद येथील ग्रामीण रुग्णालयात दोन्ही मृतदेहांचे शवविच्छेदन करण्यात आले. राजू पवार हे नुकत्याच झालेल्या ग्रामपंचायत निवडणुकीनंतर उपसरपंच पदावर विराजमान झाले होते. त्यांच्या पश्चात एक मुलगा, एक मुलगी, आई, वडील असा परिवार आहे.