विष प्राशन केल्याने युवकाचा मृत्यू

देऊळगाव राजा : तालुक्यातील सिनगाव जहागीर येथे २७ वर्षीय युवकाचा विषारी औषध प्राशन केल्याने मृत्यू झाल्याची घटना २० सप्टेंबरच्या रात्री घडली. दीपक बाबुराव घोडसे असे मृत युवकाचे नाव आहे़

दीपक बाबुराव घोडसे हा युवक २० सप्टेंबरच्या रात्री साडेआठच्या ग्रामपंचायतच्या बाजूला नवीन बस स्टँड जवळ गावातील लोकांना जमिनीवर झोपलेल्या अवस्थेत आढळला. त्याच्या बाजूला शेती मालावर फवारणी करण्याचे विषारी औषधचा डबा आढळला़ गावातील युवकांनी व त्याच्या नातेवाईकांनी तातडीने खाजगी वाहनाने देऊळगाव राजा येथे ग्रामीण रुग्णालयात दाखल केले़ त्याची प्रकृती अत्यवस्थ असल्यामुळे पुढील उपचारासाठी जालना येथे हलविले़ परंतु रस्त्यातच त्याची प्राणज्योत मालवली़ या प्रकरणी देऊळगाव राजा पाेलिसांनी आकस्मिक मृत्यूची नाेंद केली आहे़

सुविधा असूनही रुग्ण करतात रेफर

येथील ग्रामीण रुग्णालयात सर्व सुविधा उपलब्ध असताना रुग्णांना जालना येथे रेफर केले जाते़ सर्पदंश ,विषारी औषध प्राशन केल्यानंतरच्या औषध उपचाराच्या सामग्री उपलब्ध असतानाही कोणताही रुग्ण उपचारासाठी गेला असता एक चार ओळीची चिट्ठी रुग्णांच्या नातेवाईकाकडे सोपवल्या जाते़ तसेच जालना रेफर केल्या जाते़ त्यामुळे, अनेक रुग्ण वाटेतच दगावतात़ देऊळगाव राजा येथील ग्रामीण रुग्णालयातच अत्यवस्थ रुग्णांना उपचार मिळाल्यास अनेकांचे प्राण वाचू शकतील़ त्यामुळे, वरिष्ठांनी याकडे लक्ष देण्याची गरज आहे़