पाणीपुरवठा सुरळीत करण्याची मागणी

बुलडाणा : येथील कमेला परिसर प्रभाग क्रमांक ३ मधील नागरिकांना तीन इंची पाईपलाईनद्वारे पाणीपुरवठा केला जातो़ मात्र नळ जोडणी पूर्वीपेक्षा जास्त असल्याने अनेक लोकांच्या घरातील नळाला पाणी येत नसल्याची ओरड आहे. प्रभागात ६ इंची पाईपलाईन बसवण्यात यावी अशी मागणी आरपीआयचे तालुकाध्यक्ष फिरोज खान नूर खान यांच्या नेतृत्वाखाली नगर परिषदेकडे निवेदन देऊन करण्यात आली आहे.

निवेदनात म्हटले आहे की, गेल्या अनेक वर्षांपासून प्रभाग ३ मधील रहिवाशांना नगर प्रशासनाकडून ३ इंची पाईपलाईनद्वारे पाणीपुरवठा केला जाते मात्र पूर्वीपेक्षा जास्त लोकसंख्या आणि जास्त नळजोडणीमुळे प्रभागातील अनेक लोकांच्या घरातील नळांना पाणी येत नसल्याने अनेक समस्येला सामोरे जावे लागत आहे. यासंदर्भात परिसरातील नागरिकांनी अनेक वेळा नगरसेवकांकडे तोंडी तक्रारी केल्यानंतरही समस्या कायम आहे. या समस्येला कंटाळून अखेर परिसरातील रहिवासी आरपीआयचे तालुकाध्यक्ष फिरोज खान नूर खान यांच्या नेतृत्वात नगरपरिषद प्रशासनास निवेदन देऊन तत्काळ ६ इंची पाईपलाईन लावण्यात यावी अशी मागणी करण्यात आली. निवेदनावर शेख अमीर, कय्युम खान, अब्दुल हमीद, युसूफ खान, शेख करीम, मो निजाम, शेख जमील, असलम खान, शेख शकील, दगडू मोरे, जावेद खान, शेख रहीम, शेख लतीफ, शेख आमद, शेख नासीर, शेख शकुर, तसलीम खान, जाकीर खान, शे इरफान आदींची स्वाक्षरी आहे़