बुलढाण्यात बस-कंटेनरचा भीषण अपघात, ५ जण जागीच ठार, १३ जखमी

कंटेनरने बसला धडक दिल्याने हा अपघात झाला.

बुलढाणा- पुणे-मेहकर बसचा भीषण अपघात झाल्याची बातमी समोर आली आहे. या अपघातात ५ जण जागीच ठार झाले आहेत, तर १३ जण जखमी झाल्याची माहिती समोर आली आहे. 

कंटेनरने बसला धडक दिल्याने हा अपघात झाला. अपघातस्थळी बचावकार्य सुरू असून जखमींना रुग्णलायत दाखल केले आहे. 

अधिक माहिती अशी, सिंदखेड राजा तालुक्यातील पळसखेड चक्का गावानजीक कंटेनर व बसची धडक होऊन झालेल्या अपघातामध्ये ५ जण ठार झाल्याची प्राथमिक माहिती असून १३ जण जखमी झाले आहेत. हा अपघात मंगळवारी दि. २३ मे रोजी पहाटे सहा वाजेच्या सुमारास घडला. अपघातातील जखमींना सिंदखेड राजा येथील ग्रामीण रुग्णालयात हलविण्यात आले असून काही जखमींना जालना येथे पाठविण्यात आले आहे.

हा अपघात जुन्या नागपूर मार्गावर झाला आहे. मेहकर आगाराची बस ही पुण्यावरून मेहकरकडे जात असतांना पळसखेड चक्का गावानजीक कंटेनर व बसची समोरासमोर धडक झाली. त्यात बसमधील जवळपास पाच जणांचा जागीच मृत्यू झाल्याची माहिती किनगाव राजा पोलिसांनी दिली आहे. तिघांची प्रकृती गंभीर असून १३ जण जखमी आहे. अद्याप मृतांची नावे समजू शकलेली नाहीत. जखमीमध्ये दुसरबीड येथीलही काही जणांचा समावेश आहे.