दोन घरांना आग

बुलडाणा जिल्ह्यातील घटना.

ढोरपगाव (जि. बुलडाणा): येथील वेगवेगळय़ा ठिकाणी राहणार्‍या दोन भावंडांच्या घराला आग लागल्याची घटना १८ मार्च रोजी दुपारी घडली. या घटनेमुळे हजारो रुपयांचे नुकसान झाले. गावकर्‍यांच्या मदतीने ही आग विझविण्यात यश मिळाले.
येथील भिकाजी मानकर यांच्या दोन्ही मुलांचे कुटुंब वेगवेगळ्या ठिकाणी राहते.
यापैकी गजानन भिकाजी मानकर हे गावाशेजारील शेतात असलेल्या घरात राहतात. १८ मार्च रोजी दुपारी गजानन मानकर यांच्या घराला अचानक आग लागली. या आगीमध्ये त्यांच्या घरातील कापूस जळाल्याने नुकसान झाले.
या घटनेची माहिती मिळताच गावकर्‍यांनी तातडीने घटनास्थळ गाठून मिळेल तेथून पाणी आणून आग विझविण्याचा प्रयत्न केला. मात्र यामध्ये कापूस जळून नुकसान झाले. ही आग विझते न विझते तोच भिकाजी मानकर यांच्या गावात राहणार्‍या संजय मानकर यांच्या घराला आग लागल्याची घटना घडली.  त्यामुळे गावकर्‍यांनी संजय मानकर यांचे घर गाठून आग विझविली. मात्र, या आगीत संजय मानकर यांच्या घरातील फ्रीज, कपाट, ज्वारी व इतर धान्य, कपडे व अंथरुण तसेच इतर साहित्य जळून नुकसान झाले. या आगींच्या घटनांची माहिती गावकर्‍यांनी प्रभारी तलाठी एस.पी. नगराळे यांना दिल्यानंतर त्यांनी घटनास्थळी येऊन नुकसानाचा पंचनामा केला.