विविध अपघातात चार ठार

बुलडाणा जिल्ह्यात अपघाताच्या तीन घटनात चार जण मृत्यूमुखी पडले.

बुलडाणा, दि. ३- जिल्हय़ात चिखली रोडवर कार व दुचाकीच्या धडकेसह गुरुवारी झालेल्या विविध अपघातात चार जण ठार झाले.
भरधाव वेगातील कारने दुचाकीस धडक दिल्याने दोन जण जागीच ठार झाले. ही घटना चिखली तालुक्यातील पेठजवळील दत्त मंदिरासमोर ३ नोव्हेंबर रोजी दुपारी २.३0 वाजताच्या सुमारास घडली. अमडापूरकडे येत असणार्‍या एम.एच.३८- ३३७७ क्र मांकाची कारने चिखलीकडे जाणार्‍या (एम.एच.२८-८८३१) दुचाकीला धडक दिल्याने दिली. यामध्ये दुचाकीवरील शे.साबीर शे. ताज (वय ३२ रा. अमडा पूर) व संगीता पाईकराव (वय २८ वर्ष रा.चिखली) हे जागीच ठार झाले. अपघात एवढा भयंकर होता की, दुचाकीचे तुकडे पडून मोटारसायकलवरील दोघेही रस्त्या पासून बर्‍याच अंतरावर फेकल्या गेले.
दुसर्‍या घटनेत भरधाव वेगातील अँपे उलटल्यामुळे इसम जबर जखमी झाला. उपचारादरम्यान त्यांचा मृत्यू झाला. तिसर्‍या घटनेत हिंगणघाट - औरंगाबाद ही बस औरंगाबादकडे जात असताना शेलगाव हटोळ येथील सोमनाथ दाजीबा सुरडकर हे एमएच २८ एआर ३२६३ क्रमांकाच्या दुचाकीने गावाकडे जात असताना एसटीला धडक दिल्याने त्यांचा मृत्यू झाला. तर दुचाकीवरील गजानन बोर्डे (वय ५0) व नितीन सुरडकर (वय २0) हे जखमी झाले आहेत. जखमींना रुग्णालयात पोहोचविण्याकरिता खंडू मांटे, विनोद चव्हाण, सुदाम कायंदे, माधव अंभोरे यांनी मदत केली.