भविष्यात सिंदखेड ग्रामीण भारताच्या विकासाची दिशा ठरवेल : राहुल बोंद्रे

धामणगाव बढे : भविष्यातील कोरोनाचा धोका ओळखून सुमारे एक वर्षापूर्वी गावामध्ये विलगीकरण कक्ष स्थापन करून गावकऱ्यांचे कोरोनापासून संरक्षण करण्यात यशस्वी ठरलेल्या, गावकऱ्यांच्या एकजुटीतून विकासाची चळवळ राबणारे सिंदखेड गाव भविष्यात ग्रामीण भारताच्या विकासाची दिशा ठरवेल, असे म्हटल्यास वावगे ठरणार नाही, असे प्रतिपादन माजी आमदार तथा जिल्हा काँग्रेस कमिटीचे अध्यक्ष राहुल बोंद्रे यांनी केले.

मोताळा तालुक्यातील सिंदखेड येथे केंद्रीय मंत्री नितीन गडकरी यांनी दिलेल्या तीन ऑक्सिजन कॉन्सेंट्रेटरचे उद्घाटन करताना ते बोलत होते.

सामाजिक कार्यकर्ते प्रवीण कदम यांच्या नेतृत्वात सिंदखेड या छोट्याशा गावाने माजी आमदार हर्षवर्धन सपकाळ यांच्या मार्गदर्शनातून मागील काही वर्षांत गावाचा केलेला कायापालट हा प्रेरणादायी आहे.

सत्यमेव जयते वॉटर कप फाउंडेशनच्या स्पर्धेतील राज्यस्तरीय द्वितीय क्रमांकाचा खडतर प्रवास हा गावाच्या एकजुटीचे प्रतीक आहे, असेही त्यांनी सांगितले. प्रवीण कदम, ग्रामविकास अधिकारी राजेंद्र वैराळकर यांनी केंद्रीय मंत्री नितिन गडकरी यांची भेट घेत ऑक्सिजन कॉन्सेंट्रेटरची मागणी केली हाेती व गडकरी यांनी तत्काळ मान्यदेखील केली.

या प्राप्त झालेल्या ऑक्सिजन कॉन्सेंट्रेटरचे औपचारिक उद्घाटन राहुल बोंद्रे यांच्या हस्ते करण्यात आले.

यावेळी माजी आमदार हर्षवर्धन सपकाळ, जिल्हा परिषद सदस्य ॲड. गणेशसिंह राजपूत, सामाजिक कार्यकर्ते प्रवीण कदम यांच्यासह ग्रामपंचायत पदाधिकारी आरोग्य विभागाचे कर्मचारी व नागरिक उपस्थित होते.