साखरखेर्डा मंडळात दमदार पाऊस

साखरखेर्डा मंडळामध्ये बुधवारी सकाळी ८ वाजेपर्यंत ७४ मिमी पावसाची नोंद झाली. अवघ्या १ मिमी पावसामुळे तांत्रिकदृष्ट्या या मंडळामध्ये अतिवृष्टीची नोंद होऊ शकली नाही. मात्र, या मंडळात पावसामुळे मोठे नुकसान झाल्याचा अंदाज आहे.

या पावसामुळे सवडद येथील कोराडी नदीला पूर आल्यामुळे सवडद ते गजरखेड रस्त्यावरील पूल हा वाहून गेला आहे. या पुलाची उंची कमी असून २००१ तो उभारण्यात आला होता. गेल्या दोन वर्षांपासून पुराच्या पाण्याचे धक्के बसलेल्याने या पुलाला आधीच तडे गेले होते. त्याच्या दुरुस्तीची मागणी सार्वजनिक बांधकाम विभागाकडे करण्यात आली होती. सरपंच शिवाजी लहाने यांनी मेहकर व देऊळगाव राजा विभागाशी त्यासंदर्भात पत्रव्यवहारही केला होता. मात्र, दोन्ही विभागांनी हा पूल आपल्या अखत्यारित नसल्याचे सांगत ग्रामपंचायतीकडे लक्ष वेधले होते. मात्र, आता पूलच मोठ्या प्रमाणावर क्षतिग्रस्त झाल्यामुळे शेतकऱ्यांना ये-जा करण्याचा एकमेव मार्गच बंद झाला आहे. पंचायत समितीचे माजी सभापती तेजराव देशमुख यांनीही या पुलासाठी उपोषण केेले होते. आता पहिल्याच पावसाच हा पूल वाहून गेल्यामुळे त्यांनी पुन्हा उपोषणाचा इशारा दिला आहे. --उमनगावचाही संपर्क तुटला--

उमनगावचाही यामुळे संपर्क तुटला आहे. गोरेगाव ते उमनगाव रस्त्यावरील पूल पावसाने क्षतिग्रस्त होऊन त्याचा काही भाग वाहून गेला आहे. मागीलवर्षी अतिवृष्टीमुळे या नाल्यावरील पूल वाहून गेला होता. गावात जाण्यासाठी रस्ताच नसल्याने जिल्हा परिषद बांधकाम विभागाने मुरूम टाकून कसाबसा तो वापरण्याजोगा केला होता. १५ दिवसांपूर्वी सरपंच प्रकाश भगत, माजी सरपंच मोहन गायकी, शांताराम गवई, पंजाबराव मोरेंसह ग्रामस्थांनी पुलाचे काम करण्याची मागणी जि. प. बांधकाम विभागाकडे केली होती. त्याची दखल घेतली गेली नाही. आता उमनगावमध्ये कोणतेच वाहन जाऊ शकत नसल्याने या गावाचा संपर्क तुटला आहे.

-मेरा रस्त्याची दुरावस्था--

साखरखेर्डा ते मेरा रस्त्याची दुरावस्था झाली आहे. १८ कि.मी.चा हा रस्ता असून मेरा बु . शिवारापर्यंत दोन महिन्यांपूर्वी डांबरीकरण करण्यात आले. मेरा बु . शिवार ते मेरा फाटा या रस्त्याचे काम रेंगाळत पडले आहे. दोन कि.मी.पर्यंत मोठे खड्डे या मार्गावर आहे. त्यात पाणी साचल्यामुळे या मार्गावरून वाहन चालविणेही जिकिरीचे झाले आहे.

--पेरणी उलटण्याची भीती--

साखरखेर्डा मंडळात अलीकडील काळात अवकाळी पद्धतीने पडलेल्या या पावसामुळे राताळी, शिंदी, सवडद, पिंपळगाव सोनारा, साखरखेर्डा, गुंज, वरोडी, गोरेगाव, उमनगाव, पांग्रीकाटे, सायाळा, बाळसमुद्र, शेंदुर्जन, तांदुळवाडी येथील शेतकऱ्यांनी केलेली सोयाबीनची पेरणी उलटण्याची भीती व्यक्त होत आहे.

-----

सवडद ते गजरखेड हा पूल वाहून गेला. पुलाचे काम तत्काळ सुरू करून शेतकऱ्यांना रस्ता मोकळा करून द्यावा.

(शिवाजी लहाने,

सरपंच, सवडद)

----

पावसामुळे पेरलेल सोयाबीन, मूग, उडिद उगवण्याची शक्यता नाही. मी सात एकरांवर पेरलेले बियाणे खापल्याने उगवले नाही. या पावसाने पुन्हा जमिनीला फटका बसला.

(मनोहर तुपकर,

शेतकरी)