कर्णकर्कश हॉर्न, सायलन्सरचे कोणालाच कसे काही वाटत नाही !

घाबरविणारे हॉर्न लावणाऱ्यांवर नियंत्रण

बुलडाणा शहर वाहतूक विभागाच्या कर्मचाऱ्यांनी गेल्या काही महिन्यांत सातत्याने कारवाया करून वाहतूक नियमांचे उल्लंघन करणाऱ्यांवर वचक निर्माण झाला आहे. घाबरविणाऱ्या हॉर्नवर नियंत्रण मिळविण्यात येत आहे. तरीसुद्धा असे हॉर्न लावणारे काही वाहनचालक मोकाट आहेत. काही बुलेटचालक सायलन्सरचा कर्णकर्कश आवाज करत शहरात मोकाट फिरत आहेत. त्यांचाही बंदोबस्त करणे आवशयक ठरत आहे. हे वाहनचालक शाळा किंवा दवाखान्यांसमोरून जातानाही भान राखत नसल्याने कठोर कारवाई करणे आवश्यक झाले आहे.

कर्णकर्कश हॉर्न लावणाऱ्या वाहनांवर कारवाई करण्यात येत आहे. शहरात फटाक्यांसारखा आवाज करत धावणाऱ्या बुलेट सध्या कमी झालेल्या आहेत. वाहनांच्या कर्णकर्कश हॉर्नवरही बहुतांश नियंत्रण मिळविण्यात आले आहे. वाहनचालकांनी इतरांना त्रास होईल, असे वर्तन कदापि करू नये अन्यथा दंडात्मक कारवाईला सामोरे जावे लागेल.

एन. एम. परदेसी, वाहतूक पोलीस अधिकारी, बुलडाणा.

महिनाभरात ८० जणांवर पोलिसांकडून कारवाई

वाहनांना कर्णकर्कश हॉर्न बसवून ते गावभर वाजवत फिरणाऱ्या ८० पेक्षा अधिक वाहनचालकांवर पोलिसांकडून

कारवाई करण्यात आली आहे. त्यांच्याकडून ठरावीक दंड वसूल करण्यात आला आहे. तसेच हा प्रकार कायमचा बंद करण्याबाबत समजदेखील देण्यात आल्याची माहिती वाहतूक पोलीस अधिकारी एन. एम. परदेसी यांनी दिली आहे.

काय कारवाई होऊ शकते?

वाहनांच्या मूळ रचनेत प्रशासनाच्या परवानगीशिवाय बदल करणे ही बाब चुकीची आहे. असे असताना अनेकजण त्यात मनमानी बदल करतात. त्यात कर्णकर्कश हॉर्नचे प्रमाण तुलनेने अधिक आहे. अशा वाहनचालकांवर

दंडात्मक कारवाई केली जात आहे.