धामणगाव परिसरात करवंद बहरले

चैत्र महिन्यापासून या आंबटगोड काटेरी करवंदांच्या जाळ्या पसरलेल्या असतात. पांढऱ्या फुलांची गळती झाल्यावर हिरव्या रंगाची करवंदे लागतात. सध्या कडक निर्बंध असल्याने शेतकरी ते घेऊन शहरासह ग्रामीण भागात येऊ शकत नाहीत.

पिकल्यावर त्याचा रंग काळा होतो.परिसरातील लोक रखरखत्या उन्हाची पर्वा न करता हा रानमेवा जमा करतात. काही काळापूर्वी ही करवंदे पाच रुपयांना छोटे माप व दहा रुपयाला मोठे माप विकले जात होते. यातून काही लोकांना रोजगार मिळत असे. प्रचंड जंगलतोड व वणव्यामुळे करवंदाची झाडे दिवसेंदिवस कमी होत चालली आहेत. मात्र, यावर्षी कोरोनासारखे संकट आल्यामुळे आणि त्यातच संचारबंदी व ताळेबंदी यामुळे करवंदे व रानमेव्याची चव दुर्मीळ झाली आहे.

उन्हाळ्याचे आगमन होताच करवंदे व इतर रानमेवा बाजारात येतो. यामध्ये कैरी, चिंच, जांभळे आदी डोंगरदऱ्यामध्ये तयार झालेला रानमेवा बाजारात दाखल होत असे. या करवंदे व रानमेवा यामुळे लोकांना रोजगार मिळत असतो. मात्र, यंदा कोरोना संकटामुळे करवंदे व रानमेवा दुर्मीळ झाल्याचे चिन्ह निर्माण झाले आहे. रुचकर, चविष्ट, स्वस्त व औषधी असलेल्या या करवंदे व रानमेव्याची अनेकांना भुरळ पडत असते.

अनेकांचा राेजगार बुडाला

डोंगरातील रानमेवा हे लोकांचे या उन्हाळ्याच्या दिवसांत उत्पन्नाचे साधन असते. डोंगरदऱ्यातील करवंदे व रानमेवा तयार झाला असून त्याची ताळेबंदीमुळे विक्री होत नाही. त्यामुळे या फळांची चव सध्या दुर्मीळ झाली आहे. या रानमेव्याची लहान मुलांपासून मोठ्यांपर्यंत सर्वांची मागणी असते. औषधी गुणधर्म असणारी करवंदे यंदा कडक निर्बंधामुळे शहरातील नागरिकांना मिळत नसल्याचे चित्र आहे़