अज्ञात वाहनाच्या धडकेत वानराचा मृत्यू

अंढेरा : भरधाव अज्ञात वाहनाने दिलेल्या धडकेत वानराचा मृत्यू झाला़ ही घटना २० जून राेजी सकाळी चिखली-देऊळगाव राजा महामार्गावर घडली़

चिखली-देऊळगाव राजा महामार्गावर अंढेरा फाट्याजवळ रस्ता ओलांडणाऱ्या एका माकडाला अज्ञात वाहनाने धडक दिली़ या अपघातात गंभीर जखमी झालेल्या माकडाचा मृत्यू झाला़ जालना येथे कार्यरत असलेले पोलीस कर्मचारी रविराज देशमुख यांच्या निदर्शनास ही घटना येताच त्यांनी वनविभागाला माहिती दिली़ अंढेरा बीटचे वनरक्षक जीवन बिल्लारी हे तत्काळ घटनास्थळी पोहचले व सदर मृत वानरास खाजगी वाहनाने देऊळगाव राजा येथे घेऊन गेले.तेथील पशुवैद्यकीय अधिकारी डॉ़ झांबरे यांनी मृत वानराची तपासणी करून शवविच्छेदन केले.तसेच वनविभागाकडून मृत वानराचा अंत्यविधी करण्यात आला.

चिखली-देऊळगाव राजा महामार्गाचे चौपदरीकरणाचे काम अंतिम टप्प्यात असून वाहनधारक निष्काळजीपणाने वाहने भरधाव वेगाने चालवत असून अनेक अपघात घडत आहेत़