ट्रकची मिनी ट्रकला धडक, एक ठार, १२ जखमी

बुलडाणा : चिखली येथून औरंगाबादकडे मजुरांना घेऊन जाणाऱ्या एका मिनी ट्रकला देऊळगावराजाकडून येत असलेल्या ट्रकने जबर धडक दिल्याने झालेल्या अपघातामध्ये १५ वर्षांचा मुलगा जागीच ठार झाला असून, १२ जण जखमी झाले आहेत. हा अपघात २८ फेब्रुवारी रोजी दुपारी तीन वाजण्याच्या सुमारास अंढेरा फाट्यानजीक घडला. दरम्यान, या अपघातातील जखमींना प्रथम देऊळगाव मही येथील ग्रामीण रुग्णालयात उपचारासाठी दाखल करण्यात आले. तेथे त्यांच्यावर प्रथमोपचार करून तिघांना जालना तर सातजणांना बुलडाणा जिल्हा सामान्य रुग्णालयात उपचारासाठी हलविण्यात आले आहे.

मिनी ट्रक (एमएच २० बी ५६२१) हा मजुरांच्या कुटुंबांना घेऊन औरंगाबादकडे जात होता. अंढेरा फाट्यानजीक (एमपी ०९ एचएच ११५२) या ट्रकची मिनी ट्रकला जबर धडक बसली. त्यामध्ये औरंगाबाद येथील अविनाश तुंबरे अवघडनाथ (रा. माळीवाडा) हा जागीच ठार झाला तर अन्य १२ जण गंभीर जखमी झाले आहेत. सर्व जखमींना देऊळगाव मही येथील ग्रामीण रुग्णालयात उपचारासाठी दाखल करण्यात आले. त्याठिकाणी प्रथमोपचार करून तीन गंभीर जखमींना जालना येथे तर अन्य सातजणांना बुलडाणा येथील जिल्हा सामान्य रुग्णालयात उपचारासाठी दाखल करण्यात आले आहे. बुलडाणा येथे उपचारासाठी दाखल केलेल्यांमध्ये वीना अवघडराव कुमरे, निहू अवघडराव कुमरे, गीता रामनाथ कुमरे, राखी अजय कुमरे, मैना रंगनाथ कुमरे, अजय जगन्नाथ कुमरे, रुपा रंगनाथ कुमरे (सर्व रा. माळीवाडा, औरंगाबाद) यांचा समावेश आहे.