जीपच्या धडकेत एक ठार

मलकापूर : भरधाव काळी-पिवळी टॅक्सीच्या धडकेत ३० वर्षीय युवक ठार तर एक जण जखमी झाल्याची घटना १८ जुलैच्या रात्री ८ वाजेच्या सुमारास घडली.

लोकमत न्यूज नेटवर्क
मलकापूर : भरधाव काळी-पिवळी टॅक्सीच्या धडकेत ३० वर्षीय युवक ठार तर एक जण जखमी झाल्याची घटना १८ जुलैच्या रात्री ८ वाजेच्या सुमारास घडली. नांदुरा रस्त्यावरील यशवंतनगरातील रामवाडी प्रवेशद्वारासमोर हा अपघात घडला.
श्याम सत्यनारायण झंवर (वय ३०) हा युवक रात्री ८ वाजेच्या सुमारास त्याच्या नांदुरा रस्त्यावरील राहत्या घरासमोर उभा होता. तेवढ्यात नांदुऱ्यावरून मलकापुरात भरधाव आलेल्या काळी-पिवळी क्र.एम.एच.३०- ई ९१७१ या टॅक्सीने उडविले. काळी पिवळीची धडक इतकी जबरदस्त होती की, श्याम झंवर यांच्या डोक्याला व पायाला गंभीर जखमा झाल्या. त्याला नगरसेवक सुनील गांधी व पंकज खराडे यांनी तत्काळ उपचारासाठी बुलडाणा येथे हलविले असता, मोताळ्यानजीक त्याची प्राणज्योत मालवली. यावेळी विजय राधाकिसन गांधी (वय ५०) हेदेखील जखमी झाले. याप्रकरणी पोलिसांनी काळी-पिवळी टॅक्सीचालक राजू हरिभाऊ संबारे (वय ३२) रा.लक्ष्मी नगर यास अटक केली. त्याच्या विरुद्ध अ‍ॅड.अशोक त्र्यंबक खर्चे यांनी दिलेल्या फिर्यादीवरून कलम २७९,३३७,३०४ (अ) भादंविचा गुन्हा दाखल करण्यात आला आहे.