धामणगाव धाड परिसरात मिरची लागवडीला सुरुवात

धामणगाव धाड : परिसरात मिरची लागवडीस शेतकऱ्यांनी सुरुवात केली आहे़ नगदी पीक म्हणून अनेक शेतकऱ्यांनी मिरचीला पसंती दिल्याने लागवड क्षेत्र वाढणार असल्याचे चित्र आहे़

गत दोन तीन वर्षांपासून शेतकऱ्यांना दुष्काळ व निसर्गाच्या लहरीपणामुळे शेतकरी आर्थिक संकटात सापडला आहे़ यावर्षी पारंपरिक पीक मका, कपाशीचे उत्पादन घटल्याने लागवड खर्चही निघाला नाही़ मिरची लागवड केल्यामुळे दोन ते अडीच महिन्यांत उत्पन्नाला सुरुवात होत असल्यामुळे मागच्या वर्षी प्रत्येक शेतकरी आपल्या शेतात काही प्रमाणात का होईना मिरची लागवडीकडे वळला आहे; पण यंदाही शेतकऱ्यांनी मिरची लागवड केली आहे़ तसेच शेतकऱ्यांना मिरची लागवड करण्यासाठी मिरची रोपसुद्धा परिसरातील रोपवाटिकेतून शेताच्या बांधावर मिळत आहे़ परिसरातील धामणगावसह मासरूळ डोमरूळ, तराडखेड धाड या परिसरात मिरची लागवड होताना दिसत आहे़ पारंपरिक पीक पद्धतीला फाटा देत परिसरातील शेतकरी नवनवीन प्रयोग करीत आहेत़ शेतकरी आता पूर्वहंगामी मिरची लागवडीकडे वळला आहे़ पाण्याचे योग्य नियोजन करून शेतकरी लागवड करीत आहे. एप्रिल महिन्यापासूनच परिसरात मिरची लागवडीला सुरुवात झाली आहे.

मल्चिंग पेपरचा जास्त वापर

मिरची लागवड करताना मल्चिंग पेपरचा वापर शेतकरी करीत आहेत़ मिरची लागवड केल्यानंतर मल्चिंग पेपरमुळे पाणी कमी प्रमाणात लागते, तसेच गवत होत नाही़ त्यामुळे मिरचीवर रोगाचा प्रादुर्भाव होत नाही़ त्यामुळे मल्चिंगचा वापर जास्त प्रमाणात होत आहे़

सतीश जंजाळ, शेतकरी धामणगाव धाड

मल्चिंग पेपर सरतेशेवटी इतरत्र फेकून न देता त्याची योग्य विल्हेवाट लावून पर्यावरणाचा समतोल बिघडणार नाही याची दक्षता घेणे ही प्रत्येक शेतकऱ्याची जबाबदारी आहे.

प्रकाश पाटील, शेतकरी धामणगाव धाड