शेतकऱ्यांच्या मागण्यांसाठी रायमुलकरांचे धरणात आंदाेलन

हिवरा आश्रम : पेनटाकळी प्रकल्पाच्या कालव्यामुळे अनेक शेतकरी बाधित झाले आहेत. कालव्यातून पाणी पाझरत असल्यामुळे त्यांच्या जमिनी नापिकी झाल्या आहेत. शेतकऱ्यांचे नुकसान होत आहे. या शेतकऱ्यांचे सर्वेक्षण करून मदत देण्याची मागणी करूनही संबंधित विभागाने त्याची दखल घेतली नाही. त्यामुळे संतप्त झालेल्या आमदार संजय रायमुलकर यांनी पेनटाकळी प्रकल्पाच्या पाण्यात शेतकऱ्यांसह आंदाेलन सुरू केले. या आंदाेलनाची अधिकाऱ्यांनी दखल न घेतल्याने आमदार रायमुलकर यांनी धरणाच्या पाण्यात उडी घेतली. त्यामुळे, प्रशासनाची चांगलीच तारांबळ उडाली हाेती़. तरफ्यावर असलेल्या लाेकांनी आमदारांना वाचवले. एक महिन्याच्या आत मागण्या पूर्ण करण्याचे लेखी आश्वासन दिल्यानंतर त्यांनी सायंकाळी आपले आंदाेलन मागे घेतले.

पेनटाकळी प्रकल्पाच्या कालव्यामुळे दुधा, रायपूर ,पेनटाकळी या शिवारात प्रकल्पातून पाणी पाझरत असल्यामुळे शेतकऱ्यांच्या शेत जमिनी नापिकी झाल्या आहेत. ठिकठिकाणी या कालव्याला भगदाड पडले आहेत. या कालव्यातून मोठ्या प्रमाणात पाण्याचा अपव्यय होत असल्याने शेतकरी त्रस्त झाले आहेत. त्यामुळे झिरो ते अकरा किलोमीटरपर्यंतचा कालवा बंद करून पेनटाकळी प्रकल्पातून पाणी हे बंद नलिकेद्वारे नेण्यात यावे, अशी मागणी शेतकऱ्यांनी केली होती. या मागणीचा पाठपुरावा खासदार प्रतापराव जाधव, आमदार संजय रायमुलकर हे वेळोवेळी करीत आहेत. मात्र, त्याकडे अधिकाऱ्यांकडून सातत्याने दुर्लक्ष हाेत आहे. अधिकारी याची दखल घेत नसल्याने आमदार रायमुलकर यांनी सोमवारी प्रकल्पाच्या पाण्यात बसून आंदोलन केले.

अन् आमदारांनी घेतली पाण्यात उडी

सोमवारी सकाळी अकराच्या सुमारास आमदार रायमुलकर हे प्रकल्पाच्या पाण्यात उतरले. मात्र, या आंदोलनाची कोणत्याही अधिकाऱ्यांनी दखल घेतली नाही. यामुळे आमदार रायमुलकर यांनी पेनटाकळी प्रकल्पाच्या पाण्यात उडी घेतल्यानंतर सर्व यंत्रणेची तारांबळ उडाली. पेनटाकळी प्रकल्पाच्या पाण्यात तरफ्यावर बसलेले रामा अत्तरकर व पोलीस कर्मचारी काशीकर यांनी त्यांना वाचविले. त्यानंतर त्या ठिकाणी दुपारी ४ वाजता अधिकारी दाखल झाले. खासदार जाधव यांनी अधिकाऱ्यांची खरडपट्टी काढली. यावेळी कृषी उत्पन्न बाजार समितीचे सभापती माधवराव जाधव, दिलीपबापू देशमुख, कार्यकारी अभियंता राळेकर, तहसीलदार डाॅ. संजय गरकल, सिध्देश्वर पवार, एकनाथ सास्ते यांच्यासह अधिकारी व शेतकरी उपस्थित होते.

पेनटाकळी प्रकल्पाच्या कालव्यामुळे बाधित शेतकऱ्यांच्या सर्व मागण्या तत्काळ मंजूर कराव्यात. अन्यथा यापुढे शेतकऱ्यांसह स्वतःच्या कुटुंबासोबत पेनटाकळी प्रकल्पाच्या पाण्यात आंदोलन करण्यात येईल.

आमदार डॉ. संजय रायमुलकर, मेहकर