रस्ते, पुलांच्या कामांचे प्रस्ताव मार्गी लागणार

बुलडाणा : सिंदखेड राजा मतदारसंघातील रस्ते व पुलांच्या कामांच्या प्रस्तावाबाबत मुंबई येथे २८ जानेवारी रोजी बैठक पार पडली. या बैठकीत सिंदखेड राजा मतदारसंघातील रस्ते व पुलांच्या कामांचे प्रस्ताव मार्गी लावण्याविषयी चर्चा करण्यात आली. ही बैठक पालकमंत्री डॉ राजेंद्र शिंगणे यांनी सार्वजनिक बांधकाम मंत्री अशोक चव्हाण यांच्याबराेबर घेतली.

सार्वजनिक बांधकाम मंत्री अशोक चव्हाण यावेळी म्हणाले, आशियाई विकास बँकेच्या निधीअंतर्गत घेण्यात येणाऱ्या कामांमध्ये जिल्ह्यातील सिंदखेड राजा मतदारसंघातील दोन रस्त्यांचा समावेश प्राधान्याने करण्याबाबत विचार करण्यात येईल. तसेच या मतदारसंघातील प्रस्तावित २८ कोटी रकमेची रस्ते व पुलांची कामे केंद्रीय मार्ग निधीअंतर्गत घेण्याबाबत प्रस्ताव सादर करावेत.

हे प्रस्ताव प्राधान्याने विचारात घेऊ तसेच येत्या अर्थसंकल्पात जास्तीत जास्त रस्त्यांच्या कामांना निधी देण्याच्या पालकमंत्री डॉ. राजेंद्र शिंगणे यांच्या मागणीलाही चव्हाण यांनी सहमती दर्शविली. सिंदखेड राजा मतदारसंघातील रस्ते, पूल व इमारतींचा समावेश केंद्रीय मार्ग निधी, नाबार्ड, विशेष दुरुस्ती कार्यक्रम या विविध योजनेमध्ये करून त्यासाठी निधी उपलब्ध करून देण्याची मागणी पालकमंत्री डॉ. शिंगणे यांनी यावेळी केली. यामध्ये आशियाई विकास बँक अंतर्गत पाच कोटी ४३ लाख रकमेची चार रस्त्यांची सुधारणा, केंद्रीय मार्ग निधी अंतर्गत २८ कोटी ७० लाख किमतीची सुमारे १४ कामे तसेच नाबार्ड अंतर्गत १३ कोटी ३८ लाख रकमेच्या १० कामांचा समावेश आहे. तसेच आगामी अर्थसंकल्पात राज्यमार्गाची चार कामे, प्रमुख जिल्हा मार्गाची १२ कामे प्रस्तावित करण्यात आली असल्याचे शिंगणे यांनी यावेळी सांगितले.

रस्त्याच्या कामांना प्राधान्य देणार

सार्वजनिक बांधकाम मंत्री चव्हाण म्हणाले की, आशियाई विकास बँक निधीअंतर्गत प्रस्तावित अमडापूर-लव्हाणा-दुसरबीड-राहेर- वर्दळी ते जालना जिल्हा सीमा रस्ता आणि शेंदुर्जन-राजेगाव-सुलतानपूर-वेणी-गुंधा-हिरडव-वढव ते वाशिम जिल्हा हद्द या दोन्ही रस्त्यांचा समावेश करण्यासंदर्भात प्राधान्याने विचार केला जाईल. तसेच केंद्रीय मार्ग निधीअंतर्गत या मतदारसंघातील जास्तीत जास्त कामे घेण्यात येईल.

विश्राम गृह नूतनीकरणाचे प्रस्ताव पाठवा

सिंदखेड राजा येथील पर्यटन विभागाकडे असलेले विश्रामगृह सार्वजनिक बांधकाम विभागाकडे हस्तांतरित करण्यासंदर्भात पर्यटन विभागाकडे प्रस्ताव पाठवावा. त्यांच्याकडून मंजुरी आल्यानंतर त्या विश्रामगृहाचे नूतनीकरण करण्यात येईल. तसेच देऊळगाव मही येथील विश्रामगृहाच्या नूतनीकरणाचाही प्रस्ताव पाठविण्याचे निर्देश चव्हाण यांनी यावेळी दिले.