भरधाव कार खड्ड्यात उलटली, 2 जण ठार; बुलढाणा-औरंगाबाद रस्त्यावरील जांबजवळील घटना

मराठवाड्यातील जाफराबाद तालुक्यातील चापनेर येथे दिवाळी सण साजरा करून आपल्या गावाकडे कारने जात होते. दरम्यान, औरंगाबाद रस्त्यावरील जांब ते म्हसाला गावाच्या दरम्यान चालकाचे कारवरील नियंत्रण सुटले.

धाड (बुलढाणा) - चालकाचे नियंत्रण सुटल्याने भरधाव कार रस्त्यावरील कठड्यावर आदळून खड्ड्यात उलटली. यामध्ये महिलेसह तिचा दीर ठार झाला, तर दोन मुले आणि पती जखमी झाले आहेत. ही घटना बुलढाणा- औरंगाबाद रस्त्यावरील जांबजवळ ३० ऑक्टोबर रोजी रात्री घडली. सुनीता संतोष पन्हाळे (वय २६) व आकाश प्रकाश पन्हाळे (वय २४) अशी मृतांची नाव आहेत.

मराठवाड्यातील जाफराबाद तालुक्यातील चापनेर येथे दिवाळी सण साजरा करून आपल्या गावाकडे कारने जात होते. दरम्यान, औरंगाबाद रस्त्यावरील जांब ते म्हसाला गावाच्या दरम्यान चालकाचे कारवरील नियंत्रण सुटले. त्यामुळे कार रस्त्यावर असलेल्या कठड्यावर आदळली. तेथून रस्त्याच्या बाजूला असलेल्या खड्ड्यात कार उलटली. 

अपघातात सुनीता पन्हाळे यांचा जागीच मृत्यू झाला तर त्यांचे पती संतोष पन्हाळे, दीर आकाश पन्हाळे, दोन मुले गंभीर जखमी झाली. घटनेची माहिती मिळताच ग्रामस्थांनी घटनास्थळावर धाव घेऊन जखमींना उपचारासाठी हलवले. उपचारादरम्यान आकाश पन्हाळे यांचा मृत्यू झाला. तसेच इतर जखमींवर उपचार सुरू आहेत. या घटनेची माहिती अद्यापही स्थानिक पोलिसांत नसल्याचे समजते.