दुकाने बंद, रस्त्यावर गर्दी !

काेरोना विषाणू (कोविड १९) चा प्रादुर्भाव रोखण्यासाठी राज्यात साथ रोग प्रतिबंधात्मक कायदा, लागू करण्यात आलेला आहे. कोरोनावर नियंत्रण आणण्यासाठी व त्याचा प्रादुर्भाव रोखण्यासाठी बुलडाणा जिल्ह्यात कोविड-१९ चे अनुषंगाने प्रतिबंधात्मक आदेश लागू करण्यात आलेले आहेत. त्यामध्ये ३० एप्रिल २०२१ पर्यंत विशेष निर्बंध लागू करण्याचे आदेश जिल्हाधिकारी एस. रामामूर्ती यांनी ५ एप्रिल रोजी दिले आहेत. त्यानुसार जिल्ह्यात ५ एप्रिल ते ३० एप्रिल, २०२१ रोजी रात्री ११.५९ वाजेपर्यंत हा सुधारित आदेश लागू करण्यात आला आहे. या आदेशानुसार जिल्ह्यामध्ये सोमवार ते शुक्रवार सकाळी ७ ते रात्री ८ पर्यंत कलम १४४ अन्वये जमावबंदी लागू आहे. या कालावधीत ५ पेक्षा जास्त लोकांनी एकत्र येऊ नये, अनावश्यकरीत्या कोणत्याही नागरिकांनी कारणाशिवाय शहरात व गावात फिरू नये,. या व्यतिरिक्त असलेल्या वेळेत म्हणजेच सोमवार ते शुक्रवार रात्री ८ ते सकाळी ७ पर्यंत व शुक्रवारी रात्री ८ ते सोमवार सकाळी ७ पर्यंत संचारबंदी लागू राहील. या कालावधीत कोणत्याही नागरिकांनी कारणाशिवाय, विहित परवानगीशिवाय सार्वजनिक ठिकाणी, बाहेर, शहरात व गावात फिरू नये, आठवडा अखेर शुक्रवार रात्री ८ ते सोमवार सकाळी ७ पर्यंत पूर्ण संचारबंदी लागू राहील. संचारबंदी कालावधीमध्ये वैद्यकीय सेवेसह अत्यावश्यक सेवांनाच परवानगी देण्यात आली आहे. या आदेशानंतर जिल्ह्यात ६ एप्रिल रोजी व्यापाऱ्यांनी आपले दुकाने बंद ठेवली. परंतु पेट्रोल पंप, अत्यावश्यक सेवा व इतर काही ठिकाणी नागरिकांची गर्दी दिसून आली. पहिल्याच दिवशी नियमाचे उल्लंघन झाल्याचे पाहावयास मिळाले.

आदेशाबाबत संभ्रम

नागरिकांसह व्यापाऱ्यांमध्ये या नवीन आदेशाबाबत संभ्रम दिसून येत आहे. स्थानिक प्रशासनाने सार्वजनिक ठिकाणी गर्दी होणार नाही, याबाबत दक्षता घेणे व गर्दी टाळण्याच्या अनुषंगाने आवश्यक त्या उपाययोजना करण्याचे आदेश जिल्हाधिकाऱ्यांनी दिले आहेत. परंतु नागरिक सार्वजनिक ठिकाणी गर्दी करताना दिसून आले.

धार्मिक स्थळे बंद

सर्व प्रकारची धार्मिक स्थळे ६ एप्रिल रोजी बंद दिसून आले. धार्मिक स्थळी कार्यरत असणाऱ्या सर्व प्रकारच्या कर्मचारी, व्यक्ती यांना त्यांची नियमित कामे करण्यास अनुमती आहे. बाहेरच्या कोणत्याही व्यक्तीस अशा धार्मिक स्थळी येण्यास निर्बंध घालण्यात आलेले आहेत.