सावत्र आईने चिमुकल्यास केले तप्त तव्यावर उभे

मोताळा: बुलडाणा जिल्ह्यातील नांदुरा तालुक्यातील अवघ्या आठ वर्षाच्या चिमुकल्याला सावत्र आईने तप्त तव्यावर उभे केल्याने हा चिमुकला जखमी झाला असून, त्याच्यावर सध्या बुलडाणा जिल्हा सामान्य रुग्णालयात उपचार करण्यात येत आहेत. याप्रकरणी पीडित मुलाच्या मामाने बोराखेडी पोलीस ठाण्यात तक्रार दिली असून, त्यावरून पोलिसांनी सावत्र आईविरोधात गुन्हा दाखल केला आहे. पीडित चिमुकल्याचे मामा वैभव मनोहर मानकर (१९ रा. जयपूर लांडे, खामगाव) यांनी बोराखेडी पोलीस ठाण्यात २६ डिसेंबर रोजी तक्रार दिली आहे. त्यावरून बोराखेडी पोलिसांनी सायंकाळी गु्न्हा दाखल केला आहे. तक्रारीत नमूद केले आहे की, घरामध्ये खेळत असताना पीडित आठ वर्षाच्या मुलाचा लोखंडी आलमारीला धक्का लागल्याने ती आलमारी त्याच्या छोट्या बहिणीच्या अंगावर पडता पडता राहली होती. ती पीडित मुलाच्या सावत्र आईने रोखली होती. ही घटना १५ डिसेंबर २०२० रोजी सकाळी सात ते साडेसात वाजताच्या सुमारास घडली होती. त्यावेळी पीडित मुलास त्याची सावत्र आई शारदा सचिन शिंगोटे हीने गरम तव्यावर उभे केेले होते. त्यामुळे आठ वर्षाच्या मुलाचे तळपाय भाजून जखमा झाल्या होत्या. ही बाब पीडित मुलाने वैभवला सांगितल्याचे तक्रारीत नमूद आहे. दरम्यान चिमुकला जखमी झाल्यानंतर त्याच्यावर प्रथम खामगाव येथील सामान्य रुग्णालयात उपचार करण्यात आले होते. तेथून त्याला अकोला येथे उपचारासाठी नेण्यात आले होते. या प्रकरणात पोलिसांनी वैभव मानकर यांच्या तक्रारीवरून पीडित मुलाची आई शारदा सचिन शिंगोटे यांच्या विरोधात विविध कलमांसह बाल न्याय अधिनियम २०१५ (मुलाची काळजी, संरक्षण आणि पुनर्वसन) नुसार गुन्हा दाखल केला आहे. घटनेचा पुढील तपास पोलीस निरीक्षक माधवराव गरूड यांच्या मार्गदर्शनाखाली पोलीस उपनिरीक्षक अनिल भुसारी करीत आहेत.

बाल कल्याण समितीने नोंदवले बयाण

बुलडाणा येथील बाल कल्याण समितीनेही शुक्रवारी या मुलाचे बयाण नोंदविले असल्याची माहिती बाल कल्याण समितीच्या सदस्य ॲड. किरण राठोड यांनी ‘लोकमत’शी बोलताना दिली. समितीने मुलाच्या पुनर्वसनाच्या दृष्टीने त्याचे बयाण नोंदविले आहे तर पोलिसांनीही प्रकरणात गुन्हा दाखल करण्याच्या दृष्टीने शुक्रवारीच बयाण नोंदवले होते. दरम्यान, या प्रकरणात आता मुलाचा मामा पुढे आला आहे. मुलाची आजी व त्याच्या मामाने मुलाच्या संगोपनाची जबाबदारी स्वीकारल्यास अल्पवयीन मुलाला त्यांच्या ताब्यात समिती देऊ शकते, असेही ॲड. किरण राठोड यांनी सांगितले.

जिल्हा शल्यचिकित्सकांना पत्र

सध्या या मुलावर जिल्हा सामान्य रुग्णालयात उपचार करण्यात येत असून, या पीडित मुलास त्याच्या आई-वडिलांच्या ताब्यात देण्यात येऊ नये, असे पत्रच बालकल्याण समितीने जिल्हा शल्यचिकित्सक डॉ. नितीन तडस यांना दिले आहे. त्यामुळे सध्या हा मुलगा बाल कल्याण समितीच्या ताब्यात आहे.