बसस्थानकावर ताटकळत बसणे थांबले, प्रत्येक बसचे कळणार लाइव्ह लोकेशन!

महाराष्ट्र राज्य मार्ग परिवहन महामंडळाच्यावतीने एसटीमध्ये अत्याधुनिक सेवासुविधा देण्याचा प्रयत्न सुरू आहे. काही वर्षभरापूर्वी शिवशाही बस सुरू करण्यात आल्या. त्यामुळे खासगी ट्रॅव्हल्सशी स्पर्धा होऊ लागली आहे. दरम्यान, प्रवाशांसाठी इंटरनेट वायफाय अन् करमणुकीसाठी टिव्हीचा प्रयोग करण्यात आला होता; परंतु तो यशस्वी होऊ शकला नाही. दरम्यान, प्रवाशांना आपल्या बसचे लोकेशन कळावे, यासाठी महामंडळाने नवीन सिस्टम कार्यान्वित करण्याचा प्रयत्न चालविला आहे. प्रवाशांना वेळेवर माहिती मिळावी, म्हणून पब्लिक इन्फॉरमेशन सिस्टम पीआयएस कार्यान्वित करण्यात आली आहे. बसवर देखरेख ठेवण्यासाठी व्हीटीएसची मदत होणार आहे. व्हेईकल ट्रॅकिंग

सिस्टम कार्यान्वित असून, त्यातून वेगवेगळे रिपोर्ट काढता येतात. भविष्यात या सिस्टमच्या माध्यमातून एक मोबाइल ॲप तयार करण्यात येणार असून, प्रवाशांना त्यातून प्रत्येक अपडेट मिळू शकेल.

गाडीची स्पीड, लोकेशनही कळणार

अपघातांना आळा घालण्यासाठी गाडीची स्पीड नियंत्रणात असणे गरजेचे आहे. ठरवून दिलेल्या स्पीडपेक्षा जास्त वेगाने गाडी पळविल्यास आता याची माहिती नियंत्रण कक्षाला व्हीटीएस सिस्टमद्वारे मिळणार आहे. गाडीचे लोकेशनही या माध्यमातून कळणार आहे. यामुळे अपघातांचे प्रमाण कमी होण्यास मदत होणार आहे. एसटीचा प्रवास हा खरोखरच सुखी व सुरक्षित बनणार आहे. यादृष्टीने एसटी महामंडळाकडून सर्व प्रयत्न करण्यात येत आहेत.

बुलडाण्यात व्हीटीएस अन् पीआयएस कार्यान्वित

बुलडाणा विभागात व्हीटीएस आणि पीआयएस अशा दोन्ही सिस्टम कार्यान्वित करण्यात आल्या आहेत. आतापर्यंत ४०५ बसेसमध्ये व्हीटीएस सिस्टम बसविण्यात आली आहे. विभागातील १७ बसस्थानकांमध्ये एलईडी स्क्रीन बसविण्यात आल्या आहेत. छोट्या बसस्थानकांमध्ये एक तर मोठ्या बसस्थानकांमध्ये प्रत्येकी दोन स्क्रीन बसविण्यात आल्या आहेत.

-ए. यू. कच्छवे, विभागीय वाहतूक नियंत्रक, बुलडाणा.

बसस्थानकात लागले मोठे स्क्रीन

प्रवाशांना बसच्या वेळा कळाव्यात तसेच इतर माहिती मिळावी, या उद्देशाने मोठे स्क्रीन बसविले आहेत. बुलडाणा विभागातील बसस्थानकांमध्ये प्रत्येकी एक स्क्रीन आणि बुलडाणा मध्यवर्ती बसस्थानकासह मोठ्या बसस्थानकांमध्ये दोन एलईडी स्क्रीन बसविण्यात आल्या असून, त्याचा फायदा प्रवाशांना होत आहे. आजघडीला या स्क्रीनच्या माध्यमातून बसच्या वेळा तसेच आरक्षित जागांविषयी माहिती मिळत आहे. त्यामुळे प्रवाशांना जाण्यासाठी बस आहे का, असे चौकशी कक्षात विचारण्याची गरज नाही.

चालकांच्या निष्काळजीला बसणार चाप

एसटीमध्ये बसविण्यात येणाऱ्या नवीन सिस्टममुळे चालकांच्या प्रत्येक हालचालीवर लक्ष ठेवले जाणार आहे. त्यामुळे आपसुकच चालकांकडून होणाऱ्या निष्काळजीला चाप बसू शकतो. बसचे प्रत्येक लोकेशन आजघडीला आगारप्रमुख आणि स्थानकप्रमुख यांना दिसत आहे. त्याचबरोबर बसची स्पीड, बसचे ब्रेक कोणत्या पद्धतीने मारले, रॅश ड्रायव्हिंग यांसह विविध प्रकारचे जवळपास ३५ रिपोर्ट या नवीन टेक्नॉलॉजीचा वापर करून काढता येणार आहेत.