महिला चक्क नाल्यात झोपली! खून झाल्याचे समजून पोलिसांना कॉल!

पोलीस येण्यापूर्वीच निघूनही गेली, शहर व शिवाजी नगर पोलीसांची धावपळ.

अनिल गवई, खामगाव: एक महिला चक्क नाल्यात जाऊन झाेपली. पाणी वाहत असतानाच एका दगडावर डोकं टेकवून झोपलेल्या या महिलेच्या कृत्यामुळे पादचारी आणि परिसरातील नागरिकांची चांगलीच धांदल उडाली. महिलेचा मृतदेह आढळला. कुणी खून झाल्याची माहिती पोलीसांना काहींनी फोनवरून दिली. या माहितीच्या आधारे शहर आणि शिवाजी नगर पोलीसांचे पथक घटनास्थळी पोहोचले. मात्र, पोलीस येण्यापूर्वीच ती महिला उठून चालत निघून गेली.

प्राप्त माहितीनुसार, शहरातील एका वस्तीतील एक महिला सकाळी चक्क नाल्यात झोपली. कोणतीही हालचाल न करता पडून असलेल्या या महिलेमुळे प्रत्यक्षदर्शी आणि रस्त्याने ये जा करणार्यांची चांगलीच धांदल उडाली. कोणत्याही गोष्टीची शहनिशा न करता काहींनी परिसरातील नाल्यात महिलेचा खून झाल्याची माहिती पोलीसांना दिली. ही घटना वार्याच्या वेगाने परिसरात पसरताच येथे बघ्यांची गर्दी जमा झाली. कुणी शहर तर कुणी शिवाजी नगर पोलीसांना घटनास्थळी पाचारण केले. मात्र, काही वेळाने ती महिला उठली. चालत घरी निघून गेली.

पोलिसांचे नसते हेलपाटे - 

स्थानिकांकडून या घटनेची माहिती पोलीसांना मिळाली. त्यानंतर लागलिच वरिष्ठांचाही निरोप धडकल्याने शहर पोलीसांचे पथक घटनास्थळी धडकले. त्याचवेळी शिवाजी नगर पोलीसांनाही माहिती मिळाल्याने शिवाजी नगर पोलीसांचे पथकही घटनास्थळी दाखल झाले. मात्र, तत्पूर्वीच वेडसर महिला नाल्यातून उठून निघून गेली. खून झालेली महिला घटनास्थळावरून गायब झाल्याने शहर आणि शिवाजी नगर पोलीसांच्या पथकाला नसते हेलपाटे सहन करावे लागले. काहीच झाले नसल्याने पोलीसांचे पथक कारवाई न करताच माघारी परतले.

गर्मी होत असल्याने झोपली नाल्यात -

काही प्रत्यक्षदर्शीच्या म्हणण्यानुसार वेडसर असलेली ही महिला उकाड्यामुळे नाल्यात झोपल्याचे सांगितले. तर काही जणांच्या मते, तिच्या डोक्यावर परिणाम झाल्याने तिला संवेदना जाणवत नाहीत. त्यामुळे ती बडबड करीत कुठेही जावून झोपत असल्याचे सांगितले.