देवपूर येथे दोन घरामध्ये चोरी

धाड : येथून १४ किमी अंतरावर असलेल्या ग्राम देवपूर येथे दोन ठिकाणी घरफोडीची घटना घडली. यामध्ये दोन लाख ९५ हजार रुपयांचा मुद्देमाल चोरट्यांनी लंपास केला आहे.

देवपूर येथील रघुनाथ सखाराम नरोटे आणि अमोल भीमराव नरोटे यांचे गावापासून अंदाजे १ किमी अंतरावर शेतात घर आहे. ७ एप्रिल रोजी रात्री उपरोक्त शेतकरी कुटुंबासह घरात झोपले असताना अज्ञात चोरट्यांनी घरात प्रवेश करीत रघुनाथ नरोटे यांचे घरातील दोन तोळे सोन्याची पोत, एकदाणी, दोन ग्रॅम सोन्याची रिंग, नगदी ३० हजार रुपये व अमोल नरोटे यांच्या घरातून नगदी रोख एक लाख ३० हजार, दोन तोळे सोन्याची पोत, कानातील रिंग, चांदीचे २० तोळ्याचे कडे असा एकूण दोन लाख ९५ हजार रुपये किमतीचा ऐवज चोरून नेला. नेहमीप्रमाणे शेतातील कामासाठी सकाळी ५ वाजेदरम्यान या कुटुंबातील सदस्य उठले असता चोरी झाल्याचे त्यांच्या लक्षात आले. यासंदर्भात त्यांनी धाड पोलिसात तातडीने तक्रार दाखल केली. यावरून पोलिसांनी घटनास्थळी धाव घेऊन पंचनामा केला. घटनास्थळी श्वान पथक आणि ठसे तज्ज्ञांना पाचारण करण्यात आले. याप्रकरणी अधिक तपास ठाणेदार दिनेश झांबरे यांच्यासह पीएसआय सागर पेंढारकर व कर्मचारी करीत आहेत.