ट्रकची दुचाकीला धडक; युवक जागीच ठार!

खामगाव: भरधाव ट्रकने दुचाकीला चिरडल्याने वाडी येथील युवक जागीच ठार झाल्याची घटना सोमवारी तरोडा फाट्यानजीक घडली.

ठळक मुद्देघटना सोमवारी तरोडा फाट्यानजीक घडलीअकोल्याहून खामगावकडे येत होते

लोकमत न्यूज नेटवर्क
खामगाव: भरधाव ट्रकने दुचाकीला चिरडल्याने वाडी येथील युवक जागीच ठार झाल्याची घटना सोमवारी तरोडा फाट्यानजीक घडली.
वाडी येथील गोपाळ रामदास ठोकळ (२८) हा व त्याचा मित्र श्रीकृष्ण उत्तम भागवत हे सोमवारी दुचाकी क्र. एमएच २८ एव्ही ३0९५ ने अकोल्याहून खामगावकडे येत होते. दरम्यान, उपरोक्त ठिकाणी समोरील वाहनचालकाने अचानक ब्रेक लावले. त्यामुळे या मोटारसायकलस्वारांनीदेखील ब्रेक लावले. यावेळी मोटारसायकलचा तोल जाऊन गोपाळ ठोकळ हा रस्त्यावर पडला. दुर्दैवाने यावेळी समोरून वेगात येणार्‍या ट्रक क्र. जी.जे. १९ एक्स १५६४ ने गोपाळला चिरडले. यात त्याचा जागीच मृत्यू झाला. या घटनेने वाडी गावात हळहळ व्यक्त होत आहे.
गोपाळ हा किराणा व्यावसायिक असल्याने गावात सर्वपरिचित होता. मनमिळावू स्वभावामुळे त्याचे गावात अनेक मित्र होते. सात महिन्यांपूर्वी त्याचा विवाह झाला होता. त्याच्या अपघाती निधनाने ठोकळ परिवारावर दु:खाचा डोंगर कोसळला आहे. सुखी संसाराचे स्वप्न पाहणार्‍या त्याच्या पत्नीवर तरुणपणात विधवा होण्याची दुर्दैवी वेळ आली आहे. गोपाळच्या पार्थिर्वावर मंगळवारी सकाळी खामगाव येथील मुक्तिधाम स्मशानभूमीत शोकाकुल वातावरणात अंत्यसंस्कार पार पडले. गोपाळच्या पश्‍चात आई-वडील,  एक भाऊ, एक बहीण व पत्नी असा आप्त परिवार आहे.