पोहण्यासाठी गेलेल्या दोन मुलांचा शेततळ्यात बुडून मृत्यू

Two children drowned in a farmland pond : अमर शंकर बनसोडे (१४) आणि टिंकू परमेश्वर बनसोडे (१२) या दोघांचा मृत्यू झाला आहे.

धोत्रानंदई (जि. बुलडाणा) : देऊळगाव राजा तालुक्यातील वाकी बुद्रूक येथे शेततळ्यावर पोहण्यासाठी गेलेल्या तिघांपैकी दोघांचा पाण्यात बुडून मृत्यू झाला. ही घटना ७ जुलै रोजी दुपारी एक वाजताच्या सुमारास घडली. दरम्यान, तिसऱ्या मुलास वाचविण्यास स्थानिकांना यश आले असून, त्यास जालना येथे उपचारांसाठी हलविले आहे.

यामध्ये अमर शंकर बनसोडे (१४) आणि टिंकू परमेश्वर बनसोडे (१२) या दोघांचा मृत्यू झाला आहे. दरम्यान, टिंकूचा भाऊ सुमित परमेश्वर बनसोडे याचे ग्रामस्थांच्या सतर्कतेमुळे प्राण वाचले आहे. त्यास तंटामुक्त समितीचे अध्यक्ष सुरेश चेके, भुजंग चेके, जगदेव चेके, गजानन चेके यांनी तातडीने देऊळगाव मही येथील ग्रामीण रुग्णालयामध्ये उपचारांसाठी हलविले. तेथून त्यास जालना येथे पुढील उपचारांसाठी पाठविले आहे. उपरोक्त तिघे भावंडे ही शेततळ्यावर पोहोण्यासाठी गेली होती. दोघे पाण्यात बुडत असताना सुमितने त्यांना वाचविण्याचा प्रयत्न केला. मात्र तोही पाण्यात बुडत असताना त्याने आरडाओरड केल्याने स्थानिक नागरिक मदतीसाठी धावून आले. त्यामुळे सुमितचे प्राण वाचविण्यात यश आले. दरम्यान, अन्य दोघा मृतकांचे पार्थिव हे देऊळगाव मही येथील ग्रामीण रुग्णालयामध्ये उपचारांसाठी पाठविण्यात आले आहेत. या घटनेची माहिती मिळाल्यानंतर अंढेरा पोलीस ठाण्याचे पोलीस कॉन्स्टेबल राठोड यांनी लगोलग घटनास्थळ गाठून पंचनामा केला. घटनेचा पुढील तपास अंढेरा पोलीस करत आहेत. या दुर्दैवी घटनेमुळे वाकी बुद्रूक गावावर शोककळा पसरली आहे.