समृद्धीवर कार अपघातामध्ये दोन ठार, चार जखमी

नागपूरवरून पुण्याला कारद्वारे या व्यक्ती जात होत्या.

दुसरबीड : समृद्धी महामार्गावर कार चालकाचे वाहनावरील नियंत्रण सुटून झालेल्या अपघातामध्ये दोनजण ठार, तर चारजण जखमी झाल्याची घटना ६ मे रोजी सकाळी नऊ वाजण्याच्या सुमारास घडली. नागपूरवरून पुण्याला कारद्वारे या व्यक्ती जात होत्या.

कार (एमएच १२-आरएक्स-००७०) ही नागपूरवरून पुण्याकडे जात होती. दरम्यान, समृद्धी महामार्गावर मुंबई कॉरिडॉरमध्ये चॅनेल क्रमांक ३२८.८ दरम्यान चालकाचे कारवरील नियंत्रण सुटून ही कार रस्त्यावर उलटली. या अपघातामध्ये दोनजण ठार झाले, तर चारजण जखमी झाले. मृतामध्ये मुकेश कुमार, रवी कुमार यांचा समावेश आहे. जखमींमध्ये तब्रेज निहालजी, संजय पाचार, राजेश कुमार, संजय कुमार यांचा समावेश आहे. या अपघातामध्ये कारचे एक लाख रुपयांचे नुकसान झाल्याचा अंदाज वर्तविण्यात आला आहे. 

अपघातामधील जखमींना रुग्णवाहिकेद्वारे तातडीने सिंदखेड राजा येथील ग्रामीण रुग्णालयात उपचारासाठी हलविण्यात आले. अपघातग्रस्त वाहन घटनास्थळावरून हलवून नंतर येथील वाहतूक सुरळीत करण्यात आल्याची माहिती महामार्ग पोलिसांनी दिली.