नकली दारू विक्रीप्रकरणी आणखी दोघांना अटक

घरात नकली दारू बनवून विकल्याप्रकरणी आणखी दोन आरोपींना अटक; आरोपींना दोन दिवसांची पोलीस कोठडी.

नांदुरा (जि. बुलडाणा) : घरात नकली दारू बनवून विकल्याप्रकरणी आणखी दोन आरोपींना अटक करण्यात नांदुरा पोलिसांना यश आले आहे. हे दोघे नकली दारूची विक्री करीत होते, असे पोलीस तपासादरम्यान उघडकीस आले आहे. दोघांना २६ ऑगस्ट रोजी अटक करून न्यायालयापुढे हजर केले असता, त्यांना दोन दिवसांची पोलीस कोठडी मिळाली आहे. नांदुरा पोलिसांनी २४ ऑगस्ट रोजी पावणेपाच लाखांची नकली दारु पकडली होती. त्यात मुख्य आरोपी जितेंद्रसिंह मोहनसिंह राजपूत यास अटक करुन प्रथम दोन दिवस व आता पुन्हा त्याची दोन दिवसांची पोलीस कोठडी मिळविली. पद्मसिंह जयसिंह राठोड (४५ रा. निंभारी ता. मलकापूर) व गोपाल निनाजी सुशीर (३५ रा. कुंड ता. मलकापूर) हे नकली दारू घेऊन विकत असल्याचे तपासात पुढे आले. त्यामुळे या दोघांना नांदुरा पोलिसांनी अटक करून भादंविच्या कलम ३२८, ४२0, ४६८, ४७१ सह ६५ अ, ब, क, ड, ई व ८0, ८0, ८३, १0८ नुसार गुन्हा दाखल केला. पुढील तपास ठाणेदार प्रदीप सोळुंके यांचे मार्गदर्शनाखाली गोरीशंकर पागळे करीत आहेत. आरोपी कोणकोणत्या बीअर बारला या मालाचा पुरवठा करीत होते, हे शोधण्याचे आव्हान आता पोलिसांसमोर आहे.