१०२ कोरोना पॉझिटिव्ह आढळले

चंद्रपूर : जिल्ह्यात मागील २४ तासात ७४ जणांनी कोरोनावर मात केल्याने रूग्णालयातून सुटी देण्यात आली तर १०२ रूग्णांची नव्याने भर पडली. एका बाधीताचा मृत्यू झाल्याने मृतकांची संख्या ३३८ पर्यंत पोहोचली आहे.

जिल्ह्यात आतापर्यंत एकूण बाधितांची संख्या २१ हजार ४५७ वर पोहोचली आहे. सुरवातीपासून आतापर्यंत बरे झालेल्यांची संख्या २० हजार ३५० झाली आहे. सध्या ७६९ बाधितांवर उपचार सुरू आहे. जिल्ह्यात आतापर्यंत एक लाख ६१ हजार ४१५ नमुन्यांची तपासणी करण्यात आली असून त्यापैकी एक लाख ३७ हजार ८३५ नमुने निगेटीव्ह आले आहेत.

मंगळवारी मृत झालेल्यामध्ये वरोरा तालुक्यातील शेगाव येथील ६५ वर्षीय पुरूषाचा समावेश आहे. जिल्ह्यात आतापर्यंत ३३८ बाधितांचे मृत्यू झाले. यापैकी चंद्रपूर जिल्ह्यातील ३११, तेलंगणा एक, बुलडाणा एक, गडचिरोली १६, यवतमाळ सात, भंडारा एक आणि वर्धा येथील एका बाधिताचा समावेश आहे. आज बाधित आलेल्या १०२ रुग्णांमध्ये चंद्रपूर महानगर पालिका क्षेत्रातील ३९, चंद्रपूर तालुक्यातील सहा, बल्लारपूर एक, भद्रावती सहा, नागभीड एक, सिंदेवाही दोन, मूल चार, सावली चार, राजूरा १०, चिमूर चार, वरोरा १३, कोरपना सहा तसेच इतर ठिकाणच्या सहा रुग्णांचा समावेश आहे. नागरिकांनी स्वत:च्या आरोग्याबाबत जागरूक राहावे, बाहेर निघताना नियमितपणे मास्कचा वापर करावा, वेळोवेळी हात स्वच्छ करावे तसेच प्रशासनाने घालून दिलेल्या नियमांचे पालन करावे, असे आवाहन जिल्हाधिकारी अजय गुल्हाने यांनी केले आहे.