ट्रकमधून ३५ पेट्या देशी दारु जप्त

चंद्रपूर : गडचांदूर रेल्वे फाटक समोरील राजुरा रोडवरील एका १२ चाकी ट्रकमधून स्थानिक गुन्हे शाखेच्या पथकाने मंगळवारी ३५ पेट्या देशी दारू जप्त केली. या कारवाईत ट्रकचालक-मालकांविरुद्ध गुन्हा दाखल करण्यात आला आहे.

गडचांदूर रेल्वे फाटकासमोरील राजुरा रोडवर सना पेट्रोल पंप समोर एम एच २९ बीई २२८९ क्रमांकाचा ट्रक उभा असून ताडपत्रीने झाकून दारुसाठा असल्याची माहिती स्थानिक गुन्हे शाखेच्या पथकाला मिळाली. या माहितीच्या आधारावर स्थानिक गुन्हे शाखेच्या पथकांनी ट्रकची तपासणी केली असता, ट्रकमध्ये चार पेट्या १८० एमएल देशी दारू, ३१ पेट्या ९० एमएल देशी दारू आढळून आली. पोलिसांनी सर्व दारुसाठा व ट्रक असा २० लाख ४८ हजार ४०० रूपयाचा मुद्देमाल जप्त करुन ट्रक चालक-मालकाविरुद्ध कलम ६५ (अ) ८३ महादाका अन्वये गुन्हा दाखल करण्यात आला. ही कारवाई स्थानिक गुन्हे शाखेचे पोलीस निरीक्षक बाळासाहेब खाडे यांच्या मार्गदर्शनाखाली करण्यात आली.