...अन् 'त्या' शेतकऱ्याच्या फक्त पाय व डोक्यावरच करावे लागले अंत्यसंस्कार!

Chandrapur News ताडोबा-अंधारी व्याघ्र प्रकल्पाजवळ असलेल्या सोनेगाव (बेगडे) येथील देविदास गायकवाड या शेतकऱ्याचा वाघाच्या हल्ल्यात गुरुवारी मृत्यू झाला.

ठळक मुद्देवाघाने शेतकऱ्याला फाडून खाल्ले

राजकुमार चुनारकर

चंद्रपूर : ताडोबा-अंधारी व्याघ्र प्रकल्पाजवळ असलेल्या सोनेगाव (बेगडे) येथील देविदास गायकवाड या शेतकऱ्याचा वाघाच्या हल्ल्यात गुरुवारी मृत्यू झाला. दुसऱ्या दिवशी दुपारपर्यंत हल्लेखोर वाघाने रामदासच्या मृतदेहाचे तुकडे केले होते. नातेवाईक व गावकऱ्यांच्या हाती रामदासचे फक्त पाय व डोके सापडले. त्यामुळे नागरिकांना केवळ डोके व पायावरच अंत्यसंस्कार करावे लागले. यावेळी प्रत्येकाच्या डोळ्यातून अश्रू ओघळत होते.

चिमूर तालुक्यातील अनेक गावांच्या सभोवताली ताडोबा-अंधारी व्याघ्र प्रकल्पाचे जंगल लागून असल्याने अनेक गावांच्या लगत वाघांचे वास्तव्य आहे. दोन दिवसांपूर्वी चिमूर परिसरात सकाळी फिरायला जाणाऱ्या अनेकांना वाघाचे दर्शन झाले होते. अनेक जनावरांचा वाघाकडून फडशा पाडला जात आहे.

वाघाच्या हल्ल्यात ठार झालेल्या रामदासकडे चार-पाच एकर शेती असल्याने रामदास शेतीतूनच आपल्या परिवाराचे पालनपोषण करत होता. त्याच्या पश्चात आई, पत्नी असा परिवार आहे. गुरुवारी रामदास नेहमीप्रमाणे शेतावर गवत कापण्यासाठी गेला होता. गवत कापत असताना वाघाने हल्ला करून रामदासच्या नरडीचा घोट घेतला. ही घटना सायंकाळची असल्याने व अंधार झाल्याने गावकरी रामदासचा शोध घेऊ शकले नाहीत. दुसऱ्या दिवशी नातेवाईक व गावकऱ्यांनी घटनास्थळावर जाऊन पाहिले असता, वाघाने रात्रभर शरीरातील बराच भाग खाल्ला होता. त्यात फक्त डोके व दोन पाय शिल्लक उरले होते. मृताचे आप्तजन तिरडीवर नेऊन मोक्षघाटावर अंतिम संस्कार करतात. मात्र, ३९ वर्षीय रामदासच्या नशिबी मात्र वेगळेच होते. आयुष्यातील शेवटच्या क्षणातील अंतिम विधीचे सौख्यही त्याला मिळाले नाही.