वडिलांच्या हत्या प्रकरणात आणखी एकाला अटक

विरूर स्टेशन : राजुरा तालुक्यातील सिंधी येथे मुलाने वडिलांची हत्या करून रेल्वे रुळावर फेकले. पोलिसांनी चौकशी करीत आरोपी मुलाला अटक केली. दरम्यान, गुरुवारी या प्रकरणात मदत करणाऱ्या आणखी एकाला अटक करण्यात आली आहे.

त्या दोघांनाही न्यायालयात हजर केले असता तीन दिवसांची पोलीस कोठडी सुनावण्यात आली. जमीन विक्री करून मिळालेल्या रकमेसाठी घरात रात्री ११ वाजता वाद होऊन सिंधी येथील निखिल धानोरकर यांनी आपलेच वडील तिरुपती धानोरकर यांची काठीने मारहाण करून हत्या केली. भयभीत होऊन निखिलने वडिलांचाच मित्र असलेल्या भाऊराव टेकाम याला बोलावून झालेल्या घटनेची माहिती दिली व प्रकरण सारवासारव करण्यासाठी त्याची मदत मागितली. दोघांनीही दुचाकीवरून मृतदेह नेऊन विरुर रेल्वे स्टेशनजवळील रेल्वे रुळावर आणून टाकला व आत्महत्या केल्याचा देखावा केला. मात्र संशयावरून पोलिसांनी आधी निखिल व नंतर भाऊराव टेकाम यालाही अटक केली.

पुढील तपास विरुर पोलीस स्टेशनचे ठाणेदार कृष्ण कुमार तिवारी यांच्या मार्गदर्शनाखाली सुरू आहे.