कोयत्याने वार करून शेतकऱ्याला जीवे मारण्याचा प्रयत्न

आवाळपूर : तालुक्यातील आवाळपूर येथील शेतकरी अजित नामदेव बोधाने (४५) यांच्यावर त्यांच्याच शेतात जाऊन अविनाश बबन चौधरी व त्याच्या अन्य दोन साथीदारांनी कोयत्याने मारहाण करत जीवे मारण्याचा प्रयत्न केला. ही घटना शुक्रवारी सायंकाळी घडली. पोलिसांनी आरोपींना अटक केली असून पुढील तपास सुरू आहे.

अजित नामदेव बोधाने हे नियमितपणे आपल्या शेतात काम करत असताना आवाळपूर येथील अविनाश बबन चौधरी व त्याचे साथीदार आकाश नामदेव घोटकर रा. आवाळपूर व विठ्ठल तुळशीराम चौधरी रा. हिरापूर हे दुचाकीने अजित बोधाने यांच्या शेताजवळ थांबले व बोधाने यांच्या मालकीचा शेतातील सोयाबीनच्या उभ्या पिकातून चालत जात असता अजित बोधाने यांनी त्यांना पिकाची नासाडी होत असल्याने शेतातून न जाता दिलेल्या रस्त्याने जायला सांगितले. यामुळे रागात अविनाश चौधरी व त्याच्या साथीदारांनी अजित बोधाने यांना शिवीगाळ करीत मारहाण केली. कोयत्याने सपासप वार करून पळ काढला. जखमी अवस्थेत असलेल्या अजित बोधाने यांना दिलीप दुतकोर यांनी दुचाकीवर घेऊन पोलीस ठाणे गाठले व तत्काळ रुग्णालयात दाखल केले. पोलिसांनी आरोपी अविनाश बबन चौधरी, आकाश नामदेव घोटकर व विठ्ठल तुळशीराम चौधरी यांच्यावर कलम ३२३, ३२४, ५०४, ५०६ व कलम ३४ नुसार गुन्हा दाखल करीत अटक केली.