आमदार चषक कबड्डी सामन्यादरम्यान प्रेक्षक गॅलरी कोसळली; अनेकजण जखमी

वरोरा येथे विदर्भ स्तरीय सुरू असलेल्या आमदार चषक कबड्डी सामना रंगला असताना अचानक प्रेक्षकांची गॅलरी कोसळली. यात अनेकजण जखमी झाल्याची माहिती आहे.

ठळक मुद्देवराेरा येथील घटना : जखमी उपचारासाठी दाखल

चंद्रपूर : आमदार चषक कबड्डी स्पर्धेचे थाटात उद्घाटन झाले. त्यानंतर सामन्याला सुरुवात हाेताच प्रेक्षक गॅलरी काेसळली. त्यात अनेक प्रेक्षक जखमी झाले. ही घटना वराेरा (जि. चंद्रपूर) शहरातील काॅटन मार्केट मैदानावर शनिवारी रात्री १० वाजताच्या सुमारास घडली. जखमींना लगेच खासगी तसेच उपजिल्हा रुग्णालयात भरती करण्यात आले.

वरोराच्या आमदार प्रतिभा धानोरकर यांच्यावतीने अखिल भारतीय कबड्डी स्पर्धा आमदार चषकाचे आयोजन शनिवारपासून करण्यात आले. या दोन दिवसीय कबड्डी स्पर्धेचे शनिवारी उद्घाटन झाले. त्यानंतर पहिल्या दिवशी सायंकाळच्या सत्रात सामन्याला सुरुवात झाली. रात्री १० वाजताच्या सुमारास अनपेक्षितपणे प्रेक्षक गॅलरी कोसळली. त्यात अनेक प्रेक्षक जखमी झाले. जखमींवर खासगी व उपजिल्हा रुग्णालयात उपचार सुरू आहेत.

घटनेची माहिती मिळताच खा. बाळू धानोरकर यांनी घटनास्थळी धाव घेतली. त्यानंतर त्यांनी जखमींना भरती केलेल्या खासगी रुग्णालयात भेट देऊन चौकशी केली, तसेच जिल्हा सामान्य रुग्णालयात भेट देणार असल्याचे ते म्हणाले. सामने संपल्यानंतर गाणे सुरू असताना ही घटना घडली असल्याचे सांगत कोणीही गंभीर जखमी नसल्याचे त्यांनी सांगितले. नेमके किती जण जखमी झाले, हे कळू शकले नाही. यापूर्वीही अशीच घटना वरोरा येथे घडली होती, हे विशेष.