लोंबकळणाऱ्या वीजतारांपासून सावध राहा

अतिवृष्टी, वादळाने तुटलेल्या वीजतारा, खांब, रस्त्याच्या बाजूचे फीडर पिलर, रोहित्राचे लोखंडी कुंपण, फ्यूज बॉक्स, घरातील ओलसर विद्युत उपकरणे, कृषिपंपाचा स्वीच बोर्ड आदींकडे दुर्लक्ष केल्याने दुर्घटना होण्याची शक्यता असते. या दुर्घटना टाळता येतात. मुसळधार पाऊस व वाऱ्यामुळे झाडाच्या फांद्या तुटून तारांवर पडून खांब वाकतात. वीजतारा तुटण्याचे प्रकार घडतात. त्यात वीजप्रवाह असण्याची शक्यता असल्याने अशा तुटलेल्या व लोंबकळणाऱ्या वीजतारांपासून सावध राहावे. या तारांना हात लावण्याचा किंवा हटविण्याचा प्रयत्न करू नये. सार्वजनिक ठिकाणी तसेच घरगुती वीजयंत्रणा किंवा उपकरणांपासून सावधानता बाळगावी. शहरी व ग्रामीण भागातील वीजग्राहकांसाठी २४ तास सुरू असणाऱ्या १८००-२३३-३४३५, १९१२०, १९१२ या टोल फ्री क्रमांकावर संपर्क साधण्याचे आवाहन महावितरणने केले. महावितरणच्या टोल फ्री कॉल सेंटरमध्ये ग्राहकांना केवळ एकदाच ग्राहक क्रमांक सांगावा लागणार आहे. ग्राहकाने कॉल सेंटरमध्ये रजिस्टर्ड केलेल्या तीनपैकी कोणत्याही वैयक्तिक दूरध्वनी किंवा मोबाइल क्रमांकावरून तक्रार केल्यास फक्त तक्रारीचा तपशील सांगावा लागणार आहे, अशी माहिती महावितरणने दिली.

कोट

घरात शॉर्टसर्किट झाल्यास मेन स्वीच तात्काळ बंद करावा. घरावरील दूरचित्रवाणीची डिश किंवा अँटेना वीजतारांपासून दूर ठेवावा. ओल्या कपड्यांवर विजेची इस्त्री फिरवू नये. विजेचे स्वीच बोर्ड किंवा कोणत्याही उपकरणाला पाणी लागणार नाही, याची दक्षता घ्यावी. विजेच्या खाबांना जनावरे बांधू नयेत, त्यास दुचाकी टेकवून ठेवू नयेत किंवा विद्युत खांबांना तार बांधून कपडे वाळत घालू नयेत.

-सुनील देशपांडे, मुख्य अभियंता, महावितरण परिमंडळ, चंद्रपूर