रस्ते रुंदीकरणात वीज खांबांचा अडथळा

वरोरा नाका चौकापासून प्रियदर्शिनी इंदिरा चौकापर्यंत येणाऱ्या अत्यंत वर्दळीच्या मार्गाचे रूंदीकरण केल्या जात आहे. सद्यस्थितीत सार्वजनिक बांधकाम विभागाच्या विश्रामगृहापर्यंत एकेरी मार्गाचे काम अंतिम टप्प्यात आले आहे. शिवाय, चौपदरीकरणासाठी पाण्याच्या टाकीपर्यंत दुहेरी मार्गाचेही खोदकाम केल्या जात आहे.

ठळक मुद्देअपघाताचा धोका : चौपदरीकरणानंतरही खांब रस्त्याच्या मध्यभागी

राजेश मडावी।
लोकमत न्यूज नेटवर्क
चंद्रपूर : शहरातील प्रियदर्शिनी इंदिरा गांधी चौक ते वरोरा नाका या वर्दळीच्या मार्गाचे चौपदरीकरणाचे काम सध्या वेगाने सुरू आहे. मात्र, या मार्गावरील वीज खांब बाजुला न केल्याने रस्ता रुंदीकरणात या खांबाचा अडथळा निर्माण झाला आहे.
वरोरा नाका चौकापासून प्रियदर्शिनी इंदिरा चौकापर्यंत येणाऱ्या अत्यंत वर्दळीच्या मार्गाचे रूंदीकरण केल्या जात आहे. सद्यस्थितीत सार्वजनिक बांधकाम विभागाच्या विश्रामगृहापर्यंत एकेरी मार्गाचे काम अंतिम टप्प्यात आले आहे. शिवाय, चौपदरीकरणासाठी पाण्याच्या टाकीपर्यंत दुहेरी मार्गाचेही खोदकाम केल्या जात आहे. चंद्रपुरातून नागपूरकडे जाणारा हा महत्त्वाचा मार्ग असल्याने दिवसभर वाहनांची प्रचंड वर्दळ असते. याच मार्गाच्या दोन्ही बाजुला अनेक व्यावसायिक वाहने उभी केली जातात. काळाची गरज म्हणून या महत्त्वपूर्ण मार्गाचे चौपदरीकरण सुरू आहे. हा निर्णय अतिशय योग्य आहे. परंतु, मार्गाच्या दोनही बाजुचे वीज खांब जैसे-थे आहेत. रस्त्याचे बांधकाम पूर्ण झाल्यानंतर हे वीज खांब मध्यभागी येतात. खांब हटविले नाही तर नागरिक व वाहनधारकांच्या जीवालाही धोका आहे. त्यामुळे रस्त्याचे काम पूर्ण होण्याआधीच वीज वितरण कंपनी आणि सार्वजनिक बांधकाम विभागाने हे धोकादायक खांब बाजुला हटविण्याची मागणी शहरातील नागरिकांनी केली आहे.

रस्त्याच्या कडेला टाकले पाईप
वीज खांब हटविण्याबाबत काहीच हालचाली नसल्याचे पाहून बांधकाम कंपनीकडून पर्याय म्हणून मार्गाच्या कडेला पाईप टाकून बांधकाम केल्या जात आहे. संभाव्य धोका टाळण्यासाठी वीज वितरण कंपनीला या पाईपमधून भूमिगत तारा टाकता येऊ शकतात.
जनहितासाठी काढावा तात्काळ पर्याय
चंद्रपूर शहरातील वर्दळीच्या मार्गांचे रूंदीकरण व चौपदीकरण केल्यानंतरही वीज खांब जर मार्गाच्या मध्यभागी राहत असतील तर या मार्गांना काहीच अर्थ उरत नाही. अशा रस्ते बांधकामामुळे अपघात होऊन नागरिक व वाहनाधारकांच्या जीवाला धोका निर्माण होऊ शकतो. त्यामुळे वीज वितरण कंपनी व सार्वजनिक बांधकाम विभागाने आपापल्या नियमांच्या मर्यादा लक्षात घेऊनही लोकांचे जीव वाचावेत, यासाठी संयुक्तरित्या पर्याय काढणे अत्यावश्यक असल्याचे मत नागरिकांनी ‘लोकमत’ शी बोलताना व्यक्त केली.

वीज वितरण कंपनीकडे ८० लाख डिपॉझिट
सदर रस्त्याचे बांधकाम सुरू करण्यापूर्वी वीज खांब हटविण्यासाठी वीज वितरण कंपनीने १५५ लाखांचे अंदाजपत्रक तयार केले होते. दरम्यान, यापैकी अर्धा टप्पा म्हणून ८० लाखांची रक्कम वीज वितरण कंपनीकडे भरणा करण्यात आला आहे.

बांधकाम विभागाची विनंती फेटाळली
सार्वजनिक बांधकाम विभागाने सदर वीज खांब हटविण्याची विनंती एका पत्राद्वारे वीज वितरण कंपनीकडे केली होती. परंतु, पूर्ण रक्कम भरल्याशिवाय निविदा काढता येणार नाही, असा नियम असल्याचे कळवून वीज कंपनीने खांब हटविण्याची कार्यवाही प्रलंबित ठेवल्याची माहिती आहे.

चंद्रपूर मनपाअंतर्गत रस्त्यांचे रूंदीकरण सुरू आहे. बांधकाम करताना विजेचे खांब अडचणीचे ठरत आहेत. त्यामुळे हे खांब अन्यत्र शिफ्ट करण्याबाबत अंदाजपत्रक तयार करण्यात आला. बांधकाम विभागाकडून ही कामे होत आहेत. मनपाने या संदर्भात सातत्याने पाठपुरावा केला. परंतु, विजेचे खांब हटविण्यात आले नाही. सार्वजनिक बांधकाम विभागाने याबाबतचा प्रस्ताव तयार केला. वीज वितरण कंपनीकडे डिपॉझिटही भरण्यात आले. नागरिकांसाठी रस्ता सुखकर व्हावा, यासाठी मनपाकडून सहकार्य केल्या जात आहे. हा प्रश्न निश्चितपणे सुटेल.
- संजय काकडे, आयुक्त मनपा, चंद्रपूर

मार्गावरील वीज खांब बाजुला करण्याचा अंदाजपत्रक १५५ लाखांचा मंजूर झाला होता हे खरे आहे. त्यापैकी पार्ट पेमेंट ८० लाख रूपये वीज वितरण कंपनीकडे भरण्यात आले. त्यामुळे निविदा प्रक्रिया पूर्ण झाली नाही. दरम्यान, कालमर्यादेनुसार हे अंदाजपत्रक नव्याने रिव्हाईज्ड झाले. नवीन अंदाजपत्रकाला मंजुरी मिळाल्याचे आजच वरिष्ठांकडून पत्र मिळाले. त्यानुसार आता हे अंदाजपत्रक १५५ वरून १७१ कोटींवर गेले आहे. डिपॉझिट भरल्यानंतर पुढची कार्यवाही होईल.
- अविनाश कुºहेकर, कार्यकारी अभियंता,
वीज वितरण, चंद्रपूर

वीज वितरण कंपनीकडे बजेटमध्ये उपलब्ध असलेल्या निधीनुसार डिपॉझिट भरण्यात आले आहे. या घटनेला सात- आठ महिने झाले. सदर रक्कम भरून हमीदेखील घेण्यात आली. त्यामुळे पुढील कार्यवाही होणे अपेक्षित होते.
- संतोष जाधव, कार्यकारी अभियंता, सार्वजनिक बांधकाम, चंद्रपूर