शिवाजी वाॅर्डात पाच दिवसांपासून पाण्यासाठी बोंबाबोंब

बल्लारपूर : शिवाजी वॉर्डातील बीटीएस प्लांटकडे जाणाऱ्या मार्गावर मागील चार दिवसापासून नागरिकांची पाण्यासाठी बोंबाबोंब सुरू आहे.

बीटीएस प्लांट चौकातील व्यवसायी शेख बबलू यांनी सांगितले की, मागील पाच दिवसापासून आमच्याकडे पाणीच नाही, तर अनेक भागात पाणी येत नसल्याच्या नळधारकांच्या तक्रारी आहेत. शिवाजी वॉर्ड रहिवासी तेजिंदरसिंग दारी यांनी सांगितले की, सकाळी पाण्यासाठी लवकर उठावे लागते व फक्त अर्धा तासच पाणी मिळते. त्यानंतर नळाची धार कमी झाल्यामुळे पाणी मिळत नाही. डेपो विभागातील अनेक नागरिकांच्या पाण्याबाबत तक्रारी आहे. पाण्याची तक्रार करण्यासाठी शाखा अभियंता येरणे यांना फोन केला असता ते फोनच उचलत नाही, अशा तक्रारी नळ ग्राहकांच्या आहे. डेपो विभागात जुन्या पाईपलाईनमधून पाण्याची नासाडी होत आहे. यामुळे नवीन पाईप लाईनमधून नळ ग्राहकांना पाणी मिळत नसल्यामुळे जुनी पाईप लाईन त्वरित बंद करावी, अशी नळ ग्राहकांची मागणी आहे.