चंद्रपूरकरांना ‘अमृत’साठी आणखी सहा महिन्यांची वाट

चंद्रपूर : शहरातील साडेतीन लाख लोकसंख्येला पिण्याचे पाणी मिळावे, याकरिता केंद्र शासन पुरस्कृत अटल मिशन फॉर रिज्युवेनेशन अ‍ँड अर्बन ट्रान्सफॉर्मेशन म्हणजे अमृत या नळ योजनेवर आतापर्यंत १९२ कोटी २० लाखांचा निधी खर्च झाला. तुकूम व विठ्ठल मंदिर झोनमध्ये प्रायोगिक स्तरावर नळयोजना सुरू झाली. मात्र, उर्वरित १४ झोनमधील लाखो नागरिकांना ‘अमृत’साठी पुन्हा किमान सहा महिन्यांहून जास्त काळ प्रतीक्षा करावी लागणार असल्याचे ‘लोकमत’च्या पाहणीतून पुढे आले.

चंद्रपूर शहराचा झपाट्याने विस्तार होत आहे. सद्य:स्थितीत ८२ हजारांहून जास्त घरे असून, जुन्या पाणीपुरवठा योजनेतून केवळ ३५ हजार अधिकृत नळधारक पिण्याच्या पाण्याची गरज भागवितात. इतर नागरिकांना अन्य स्रोतांवर अवलंबून राहावे लागते. जुन्या नळयोजनेतून संपूर्ण शहराला मुबलक पाणीपुरवठा होऊ शकत नाही. मागील आठवड्यात शहरातील १६ पैकी दोन झोनमध्येच अमृत नळयोजना सुरू होऊ शकली. कामे पूर्ण न झाल्याने अमृत योजनेला दोनदा मुदतवाढ देण्यात आली. परिणामी, नागरिकांमध्ये नाराजी आहे.

जलशुद्धिकरण केंद्राचे काम अपूर्णावस्थेत

तुकूम येथील जलशुद्धिकरण केंद्राच्या सुधारणेचे ७३ टक्के काम पूर्ण झाले. परंतु, क्लरिफाय, प्लॅश मिक्सर, फिल्टर रूम, अ‍ॅलम सोल्युशन टँक, ब्लोअर, फिल्टर बेडमधील पॅनेल, तसेच १७० अश्वशक्तीचे तीन पंप बदलविण्याची कामे पूर्ण झाली आहेत.

इरई धरणातील पंपहाऊसचे विस्तारीकरण

इरई धरणातील हेडवर्क्समधील पंप हाऊस विस्तारीकरणाचे काम ९८ टक्के पूर्ण झाले. त्यातील तीन लाख लिटर बीपीटीचे कामही अंतिम टप्प्यात आहे. ९०० मिमी व्यासाच्या जलवाहिनीचे काम पूर्ण झाले. प्रकल्पाच्या तांत्रिक व वीज कामांसाठी ५ कोटी १५ लाखांचा निधी खर्च झाला आहे.

झोननिहाय पाण्याची टाकी

तुकूम, शास्त्रीनगर, बंगाली कॅम्प, नेताजी नगर बाबूपेठ, बाबूपेठ हायवे, रेव्हनी कॉलनी व वडगाव येथील एकूण आठ पाण्याच्या टाकींचे ९४ टक्के बांधकाम पूर्ण झाले. महाकाली झोनमधील टाकीचे काम ९१ टक्क्यांवर थांबले. किरकोळ कामेही शिल्लक आहेत.

पाईपलाईन ८८ टक्क्यांवर अडले

तुकूम व रामनगर झोनमध्ये ९००, ६००, ४५०, ४०० आणि ३०० एमएम व्यासाच्या पाईपलाईनचे काम ८८ टक्क्यांवर अडले. गुरुत्ववाहिनीची कामे १०० टक्के पूर्ण करण्याचे मनपाचे प्रयत्न सुरू आहेत. बाबूपेठ येथील पाण्याच्या टाकीसाठी ३५० व ४०० एमएम व्यासाचे पाईपलाईन काम पूर्ण झाले आहे.